‘जोर्नी प्रत्यारोपणपछि जीवनलाई सामान्य अवस्थामा फर्काउन सकिने’

२३ पौष २०७४

banner

काठमाडौँ । शल्यक्रियाको माध्ययमबाट जोर्नी प्रत्यारोपण गरेपछि बिरामीलाई पहिलेकै अवस्थामा सामान्य र उत्पादनशील जीवनमा फर्काउन सकिने शनिबार राजधानीमा आयोजित अन्तरक्रिया कार्यक्रममा सहभागीले बताएका छन्। 

ग्राण्डी अन्तर्राष्ट्रिय अस्पतालले सेवा सञ्चालन गरेको पाँचौँ वर्ष प्रवेशको उपलक्षमा अस्पतालको अर्थोपेडिक तथा ट्रमाटोलोजी विभागअन्तर्गतको जोर्नी प्रत्यारोपण, स्पोर्टस् मेडिसिन तथा आथ्रोस्कोपी युनिटले शनिबार आयोजना जोर्नी प्रत्यारोपण परिवारको प्रथम भेला तथा अन्तरक्रियामा अस्पतलमा मेडिकल डाइरेक्टर तथा वरिष्ठ जोर्नी प्रत्यारोपण विशेषज्ञ डा चक्रराज पाण्डेले ह्वीलचेयरमा अस्पताल आएका बिरामीहरु हिँडेर घर फर्कने गरेको बताएका हुन्। 

बढ्दो उमेरसँगै जोर्नीहरु खिइने र बिग्रने, चोटपटक लागेर जोर्नी फुट्ने र कसैकसैमा जन्मजात भएको खराबीका कारण जोर्नी प्रत्यारोपण गर्नुपर्ने उल्लेख गर्दै उनले प्रत्यारोपण गरेपछि पलेँटी मारेर, टुक्रुक्क बस्न नहुने, रुख नचढ्न तथा शरीरलाई धेरै भार पार्ने काम नगर्न र शरीरको तौल नियन्त्रणमा राख्नुपर्ने बताए। 

नेपालमै जोर्नी प्रत्यारोपण सेवा उपलब्ध भएपछि आफूहरुले निकै राहत महसुस गरेको जोर्नी प्रत्यारोपण गरेका व्यक्तिले बताएका थिए । दुई वर्षअघि सोही अस्पतालमा जोर्नी प्रत्यारोपण गराएकी काभ्रेपलाञ्चोकका ६८ वर्षीया सञ्चमाया तामाङले प्रत्यारोपणपछि आफू अपाङ्ग जीवनबाट मुक्त भएर सहज रुपमा हिँडडुल गर्न सक्ने भएको अनुभव सुनाइन्। 

सो अवसरमा जोर्नी प्रत्यारोपण गराउनेमध्ये ७० प्रतिशत उपत्यकाबाहिरका रहेको र तीमध्ये पनि धेरैजसो महिला भएको जानकारी दिइयो। ग्राण्डी अस्पतालले पाँच वर्षको अवधिमा सयौँको घुँडा तथा नितम्बको सफल प्रत्यारोपण गरिसकेको जनाएको छ। रासस

Leave a reply

HTML Tags are not supported

Post My Comment »