कहिलेसम्म दर्शक किनेर ‘स्टार’ बन्ने ? 

२९ माघ २०७४

banner

सुरक्षा भट्टराई

काठमाडौँ । यतिबेला हलहरुमा नेपाली चलचित्र ‘कृ’ लागिरहेको छ । ‘कृ’ यो बर्षकै सबै भन्दा ठूलो बजेटमा बनेको चलचित्र हो । चलचित्रमा मुख्य भूमिकामा युवास्टार अनमोल केसी देखिएका छन् । उनको यो दुई बर्ष पछिको कमब्याक हो । चलचित्रलाई नेपाली दर्शकले निकै कुरिरहेका थिए । 

लामो समयसम्म चलचित्रको कुनै अत्तोपत्तो नलागेपछि चलचित्र आउँछ या आउँदैन भन्ने अन्योलसमेत सिर्जना भएको थियो । तर, अनमोलको स्टाडमबाट ढुक्क भएर होला निर्माण टिमले प्रचार प्रसारमा त्यति ध्यान दिएनन् । दुई बर्षसम्म पनि चलचित्रको छायांकन नसकेर चलचित्र रिलिजको एक हप्ता अगाडि चलचित्रको रोमान्टिक गीत सुटिङका लागि निर्माण युनिट स्कटल्यान्ड पुग्यो । 

चलचित्रको पहिलो गीतलाई ३ महिना लगाए खिचिएको अनमोल आफैले बताएका थिए । तर चलचित्रको दोस्रो गीतका लागि भने चलचित्रको प्रचार गर्न छाडेर निर्माण युनिट स्कटल्यान्ड उड्यो । हतारको काम बिग्रिन्छ भनेझैं चलचित्रको ‘मैले जानी नजानी’ बोलको गीतले न हाइप पायो न तारिफ । किनकि गीतमा कोरियोग्राफी निकै कमजोर र हतारमा गरेको भनेर स्पष्ट झल्किन्थ्यो । 

शुक्रबार चलचित्र हलमा पुग्दा ‘कृ’सँगै बलिउड चलचित्र प्याडम्यान पनि हलमा लाग्यो । शुक्रबार चलचित्र ‘कृ’ले सोचेको जस्तो ब्यापार गर्न सकेन र हलवालाले शनिबार ‘कृ’को शो घटाए । तर शनिबार चलचित्रले अचम्मित पार्यो । एक्कासी चलचित्र सबै हलमा हाउसफुल भएको खबर बाहिर आयो । 

चलचित्रले मल्टिप्लेक्समा धेरै शो नपाएपनि स्मल थिएटरमा भने राम्रो शो पाएको थियो । हलमा दर्शक पनि उतिकै देखिए तर सबै दर्शक ‘कृ’ हेर्न आएका थिएनन् । बलिउड चलचित्र प्याडम्यान पनि हेर्न आएका थिए । दर्शक मिसिएका कारण अनमोलको क्रेज ज्यादा देखियो । चलचित्रलाई क्रिटिक्सहरुले हेरेर प्रतिक्रियामा यो बर्षकै कमजोर चलचित्रको उपाधि दिए चलचित्रको स्क्रिप्ट एकदमै कमजोर रहेको तर अनमोलले गरेको मेहनत देखिएको थियो । 

चलचित्र ‘कृ’ ले दोस्रो दिन दर्शक त पायो तर ती सबै दर्शक आफैं हलसम्म पुगेका थिए वा उनीहरुमध्ये धेरैलाई हलसम्म पुर्याइएको थियो भन्ने प्रश्न यतिखेर उब्जिएको छ । हलमा पुगेकाहरुमध्ये कतिपय प्रायोजित रुपमा त्यहा उपस्थित रहेका उनीहरुसँगको कुराकानीका क्रममा खुल्यो । माहोल बुझ्दा हाउस फुल देखाउन चलचित्र पक्षले निकै पापड बेलेको बुझ्न कठिन थिएन ।

राजधानीमा आईतबार चलचित्र ‘कृ’को विशेष शो राखिएको थियो जहाँ पत्रकार र रंगकर्मीको पनि उपस्थित रहेको थियो । भीड त्यहाँ पनि थामिनसक्नु नै थियो तर दर्शक सबै स्वतस्फुर्त गएका थिएनन् । किनिएका दर्शक पनि बाक्लै भेटिए ।

कार्यक्रममा जब अनमोलको प्रवेश भयो दर्शकलाई हुटिङको लागि आग्रह गरियो । यस्तो आग्रह निकै अस्वभाविक देखिन्थ्यो । स्वाभाविक अनमोलका फ्यान छायाँमा परे प्रायोजित फ्यान हावी भए ।

अनमोल सदाझै बडीगार्ड सहित उपस्थित भएका थिए । केही फ्यान हातमा फुलहरु लिएर बसेका थिए । एक एक गर्दै अनमोलले पनि फ्यनबाट फूल ग्रहण गरेका थिए । अनमोलसँगै चलचित्रकी नायिका अदिती बुढाथोकी र अनुप बिक्रम शाही पनि त्यहा थिए । अनमोललाई हुटिङ गरेपछि अनुप र अदितीलाई पनि हुटिङ गरियो । त्यो हुटिङ पनि प्राकृतिक र स्वाभाविक लाग्दैनथ्यो । 

यसले बुझ्न सकिन्छ हलमा प्रायोजित फ्यान पनि थिए । एकै चलचित्रका तीन फरक फरक कलाकारका फ्यान एउटै हुनु अस्वाभाविक मानिन्छ । अर्थात ती फ्यान किनिएका थिए ।

नेपाली दर्शक र मिडियालाई कहिलेसम्म किन्ने र किनिएका फ्यान देखाएर कहिलेसम्म खल्लो स्टाडम देखाउने ? चलचित्रकर्मीले बुझ्ने कुरा हो कि सधैभरि दर्शक किनेर चलचित्र रिलिज गर्ने हो भने चलचित्र नबनाउँदा पनि हुन्छ । अनमोललाई साच्चिकै मन पराउने दर्शक पनि छन् । उनका अनगिन्ती रियल फ्यानहरु पनि छन् । तर नक्कली फ्यानले 'भ्यालु' पाउँदा सक्कलीलाई पक्कै नराम्रो लाग्नेछ  ।

Leave a reply

HTML Tags are not supported

Post My Comment »