विदेश हिँडेका युवाको दुर्घटनामा मृत्यु, छोराको कमाइले साहुको ऋण तिर्ने आमाको सपना अधुरै

८ बैशाख २०७४

सिन्धुली । छोराले विदेशबाट पैसा कमाएर ल्याउला अनि दुःखका दिन सकिएला भन्ने ठानेका बालाबखर ८ धनुषाका रामबुझाम मण्डलको सपना अधुरै रह्यो।

छोराले दुःख गरेर भए पनि पैसा कमाएर ल्याउला र साहुको ऋण तिरौंला भनेर वैदेशिक रोजगारीका लागि विदाइ गरिएको छोराको दुई दिनमै शव देखेपछि मण्डलको सपना मात्र अधुरो रहेन, सदाका लागि काख नै रित्तियो। उनको बुढेसकालाको सहारा नै गुम्यो।  

मलेसिया हिँडेका बालाबखर ८ धनुषाका सरोजकुमार मण्डलको बुधबार बीपी राजमार्गअन्तर्गत सिन्धुलीको कमलामाई नगरपालिका २ पीपल भन्ञ्याङमा भएको बलेरो दुर्घटनामा मृत्यु भएपछि मण्डल परिवारमा यस्तो बज्रपात परेको हो। छोराको शव बुझ्न बिहीबार सिन्धुली अस्पताल पुगेका रामबुझम मण्डल घरी बर्बराउने, घरी अचेत छन्। ‘छोरालाई हाँसीखुसी विदाइ गरिएको दुई दिनमै मुख देख्न पाइएन’, बर्बराउँदै उनले भने, ‘अब जिन्दगीका सबै सपना चकनाचुर भए ।’

कतारमा तीन वर्ष बसेर एक वर्षअघि घर आउनुभएका सरोज पुनः वैदेशिक रोजगारका लागि मंगलबार घरबाट विदा भएर काठमाडौं आएका थिए। म्यानपावर कम्पनीले बुधबारको टिकट नमिलेर आगामी सोमबारका लागि मात्र टिकट हुने भनेपछि उनी फेरि घर फर्कंदै थिए। घर फर्कने क्रममा उनी चढेको बलेरो जिप सडकबाट २ सय मिटर तल खस्दा सरोजको घटनास्थलमै मृत्यु भयो।

‘बुबा अचेत हुन थाल्नुभएको छ । घरमा आमा घटना थाहा पाएदेखि नै अचेत अवस्थामा हुनुहुन्छ’, मृतक सरोजका भिनाजु फूलमान मण्डलले दुखेसो पोख्दै भने ।’ सरोजसँगै वैदेशिक रोजगारीमा हिँडेका सोही ठाउँका जयकुमार यादवको पनि दुर्घटनामा मृत्यु भएको छ । उनको परिवारमा पनि रुवाबासी छ। सरोज र जयकुमारको घटनास्थलमै मृत्यु भएको सिन्धुलीका प्रहरी प्रमुख उमाशंकर पञ्जियारको भनाइ छ।

‘साहुसँग ऋण काढेर विदेश हिँडेको झन्डै ज्यान गएन’, दुर्घटनाका गम्भीर घाइते राकेशकुमार यादवले भन्नुभयो, ‘सँगैका साथी गुमाउनुपर्‍यो । आफ्नो खुट्टा गुम्यो ।’ ‘बाँचेर पनि अब केही गर्न नसकिने भयो’, उनले भने । उनीसँगै गम्भीर घाइते जितनाराण यादवको पनि अवस्था उस्तै छ । ‘एउटा खुट्टा तीन ठाउँमा भाँच्चिएको छ । शरीरभरि चोट लागेको छ ।

बलेरोमा सवार आठजना गम्भीर घाइते छन् । गम्भीर घाइतेमध्ये एकजनाको काठमाडौंमा र अन्य सातजनाको जनकपुरमा उपचारका लागि सिन्धुली अस्पतालले रेफर गरेको छ । बुधबार काठमाडौँबाट धनुषातर्फ आउँदै गरेको बा १ ज ५ नम्बरको बलेरो दुर्घटना भएको थियो। आजको अन्नपूर्ण पोस्ट दैनिकमा खबर छ।

Leave a reply

HTML Tags are not supported

Post My Comment »