अर्घाखाँचीको सुपा देउरालीमा पर्यटकको सङ्ख्यामा वृद्धि

८ बैशाख २०७४

banner

सन्धिखर्क । प्रसिद्ध धार्मिकस्थल सुपा देउरालीमा धार्मिक पर्यटकको सङ्ख्यामा वृद्धि भएको छ । विगत वर्षमा दैनिक दुई सयदेखि एक हजारको सङ्ख्यामा दर्शनार्थी आउने गरेका थिए । अहिले दैनिक एक हजारदेखि दुई हजार दर्शनार्थी आउने गरेका मन्दिर संरक्षण समितिका अध्यक्ष प्रितम थापाले जानकारी दिए ।

नयाँ वर्षमा वैशाख एक गते करिब १२ हजार जनाभन्दा बढी व्यक्ति दर्शन गर्न आएको उनले बताए । उक्त दिन मन्दिरमा  एक लाख नौ हजार आठ सय भेटी चढेको थापाको भनाइ छ । सन्धिखर्क नगरपालिका–७ खाँचीकोटमा रहेको सुपा देउराली मन्दिरमा अहिले भेटिबाट उठेको रकमबाट विभिन्न विकास निर्माणका काम भइरहेका छन् ।

मन्दिरमा चढाएको भेटिबाट आदर्श मावि खाँचीकोटमा ६ जना तथा शान्ति निमावि सितापुरमा चारजना शिक्षकलाई पारिश्रमिक उपलब्ध गराइँदै आएको अध्यक्ष थापाले बताए  । भेटिबाट सङ्कलित रकममध्ये विद्यालयलाई  एक लाख २० हजार उपलब्ध गराइएको छ ।

यस्तै सन्धिखर्कमा रहेको पाणिनि वेदविद्या आश्रमकालागि वार्षिक  एक लाख २० हजार उपलब्ध गराइने मन्दिर व्यवस्थापन समितिका सचिव यादव घिमिरेले बताए । “अन्य विकास निर्माणका काममा पनि सहयोग गर्दै आएका छौँ,” उनले भने ।

उक्त मन्दिरमा अघिल्लो वर्ष  ६० लाख आम्दानी भएको थियो । यस वर्ष आम्दानी बढेर ८० लाख पुग्ने सचिव यादवको भनाइ छ । मन्दिरको दर्शन गर्न अर्घाखाँची, कपिलबस्तु, दाङ, प्यूठान, गुल्मी, रुपन्देहीलगायत जिल्लाबाट बढी मात्रामा दर्शनार्थी आउने गरेका छन् । भारतको उत्तर प्रदेश र बिहारबाट समेत दर्शनार्थी सुपा देउराली आउने गरेका छन् ।

सुपा देउरालीको मन्दिरसम्म केवुलकार र पद्मार्ग निर्माण गर्न सके यहाँ पर्यटकीइ गतिविधि बढ्ने सहायक प्रमुख जिल्ला अधिकारी नारायण खत्री बताउनुहुन्छ । सन्धिखर्क गोरुसिङ्गे सडक खण्डसँगै जोडिएकाले यहाँ आन्तरिक पर्यटक आउने क्रम बढेको छ । यहाँबाट मनमोहक दृश्य अवलोकन गर्न पाइन्छ । यहाँ गर्मीयाममा तराईबाट गर्मी छल्न सर्वसधारण आउने गर्छन् । रासस


 

Leave a reply

HTML Tags are not supported

Post My Comment »