निर्मला

२८ भाद्र २०७५

banner

ठाकुर बेलवासे

तिमीसंग के थियो निर्मला !
जुन उसका 
दिदी, वहिनी र आमासंग थिएन 
र..तिमी सामु ऊ एकाएक राक्षस बन्यो !

तिमीले सम्भवत सम्झाउन भ्याइनौँ होला 
ऊ उसकी आमाको 
गुप्ताङ्गैबाट जन्मिएको थियो !
र... तिमीले यो पनि सम्झाउन सकिनौं होला 
कि ऊ उसकी आमाका दूधका लाम्टा चुसेर 
उन्मत्त भएको हो !
र..तिमीले अन्तिममा भन्न सकिनौ होला 
राक्षस मसंग भएका अङ्गहरु तेरी आमासंग पनि छन् !

यो मुलुको संघीय संरचना 
आफ्ना भविष्यका सपनाको माला उनेर 
गलामा पहिर्याइ दिएका जनप्रतिनीधि 
देशका राष्ट्रपति या प्रधानमन्त्री 
अझ भनौ न देशका सुरक्षा निकायसंग 
तिम्रो के दुष्मनी थियो निर्मला !
र..
तिमी आफ्नै दाइ या भाइजस्तै लाग्ने 
मान्छे रुपको राक्षसबाट विभत्स बन्यौं !

तिम्रो विभत्सताले 
यतिवेला आधुनिक सभ्यतालाई थुकिरहेको छ 
मेरो देशको सरकार त्यही थुकमा चिप्लेटी खेलिरहेको छ !

तिम्रो विभत्सता देखेर
पुरुष हुनुको पीडाले 
आगोमा जलिरहेको छ, मन 
म आफैलाई थुकिरहेको छु 
म आफैलाई मारिरहेको छु 
कतै म राक्षस बने भने !

मेरो देशको सरकार 
तिम्रो विभत्सताको संगीतमा लीला गर्दै छ 
राक्षसहरुका धुनमा त्रासदी गीत गाइरहेको छ !

पुरुषहुनुको ग्लानीले 
छटपटाएको बेला 
अर्की निर्मलाको विभत्सता सुन्दैछु !


यो समाजले
यो देशले 
तिमजिस्तै दिदी,बहिनी र आमाहरुसंग पनि
शत्रुता बोकेको पो छ कि !

Leave a reply

HTML Tags are not supported

Post My Comment »