एजेन्सी। ओडिशाको राजधानी भुवनेश्वरमा एउटा आश्चर्यजनक घटना सार्वजनिक भएको छ । यहाँको पश क्षेत्रमा आइआरसी भिलेजमा रहेको एक होटलमा पुलिसले छापा मारेर कोठामा जडान गरिएका गोप्य क्यामेरा बरामद गरेको छ । यस विषयमा पुलिसले होटलका २ कर्मचारीलाई पक्राउ गरेको छ ।

आज तकको समाचारअनुसार यी दुई आरोपीले होटलमा जडान गरिएका यी क्यामेराबाट जोडीको गोप्य भिडियो बनाएर ब्ल्याकमेलिङको खेल खेल्थे । होटल आर्य रेसिडेन्सीमा कोठा र बाथरुममा समेत गोप्य क्यामेरा जडान गरिएका थिए । पुलिसलाई होटलको बारेमा उजुरी आएपछि छापा मारिएको थियो । उजुरी गर्ने महिलाले बताएअनुसार केही समय अगाडि उनी होटल आर्य रेसिडेन्सीमा आफ्ना साथीहरुसँग जन्मदिनको पार्टी मनाउन गएकी थिइन् ।

त्यसको केही दिनपछि महिलालाई एक फोन आयो । आरोपीले महिलालाई उनको अन्तरंग पलको भिडियो आफूसँग भएको र त्यसलाई भाइरल गर्न लागेको बताए । आरोपीले महिलालाई पैसा नदिए भिडियो इन्टरनेटमा हालिदिने धम्की दिएका थिए । यो फोनपछि महिलालाई होटलको स्टाफमाथि शंका भयो । त्यसपछि उनले पुलिसमा उजुरी दिएकी थिइन् ।