काठमाडौं। पछिल्लो समय मानिसहरु कोरोनाभाइरसको संक्रमणबाट बच्न आफूले सकेजति प्रयास गरिरहेका छन् । तर, जर्मनीका एक मेयरले भने जानीजानी आफैंलाई कोरोनाभाइरसबाट संक्रमित गरेको खुलासा गरेका छन् । उनले आफूभित्र रोग प्रतिरोधी क्षमता विकास गराउन भन्दै आफैंलाई संक्रमित गराएको भएपनि यो काम आफ्नो लागि निकै कठिन सावित भएको बताएका छन् ।

यसरी आफैंलाई संक्रमित गराउने मेयर हुन् राजधानी बर्लिनको मिट्टे क्षेत्रका मेयर स्टिफन भान डसेल । उनले गत बुधबार एक अन्तरवार्ताको क्रममा यसको खुलासा गरेको जर्मन मिडिया डशे वेलेले लेखेको छ । उनले ट्वीटरमार्फत पनि आफूले यतो घातक प्रयास गरेको खुलासा गरेका छन् । ‘म आफूले सोचेभन्दा धेरै बिरामी भएँ । मैले आफूभित्र रोग प्रतिरोधी क्षमता विकास गराउन संक्रमण गराएको थिएँ’ उनले भने ‘मलाई लागेको थियो म ३ दिनसम्म बिराकी हुन्छु त्यसपछि रोगलाई प्रतिरोधी क्षमता विकास गरेर जित्छु अनि त्यसपछिका दिनमा संक्रमित हुने छैन र अरुलाई पनि सार्ने छैन । तर स्थिति मैले सोचेको भन्दा निकै डरलाग्दो भयो ।’

Vielleicht war meine Äußerung im Radio heute missverständlich. Aber mein Handeln war und ist verantwortungsvoll. Ich war, bin und bleibe solange in Quarantäne, bis ich niemanden mehr anstecken kann. https://t.co/EFDNMrWffd

— Stephan von Dassel (@DasselVon) April 1, 2020

मेयरका अनुसार पहिले उनकी श्रीमती संक्रमित भएकी थिइन् । श्रीमती संक्रमित भएसँगै उनलाई संक्रमण सर्ने खतरा बढेको थियो तर कहिले सर्छ भनेर डराउँदै पर्खनु उनलाई उचित लागेन । बरु आफूलाई पनि संक्रमित गराउने र शरीरमा रोग प्रतिरोधी क्षमता विकास गरेर भाइरसलाई जित्ने सोचका साथ उनी जानीजानी श्रीमतीसँग नजिकिए र आफूलाई संक्रमित गराए । यद्यपि अहिले भने यी मेयर निको भएका छन् । श्रीमती र आफू दुवै ठिक भएको भन्दै उनले आफू पहिलेभन्दा बढी जिम्मेवार पनि भएको बताएका छन् ।