काठमाडौं। अमेरिकी राष्ट्रपति डोनाल्ड ट्रम्पका प्रमुख इमान्जेलिकल समर्थक, लिबर्टी विश्वविद्यालयका अध्यक्ष जेरी फलवेल जुनियरको नेतृत्व सोमबार सार्वजनिक भएको एक विवादित यौनकाण्डका कारण धरापमा परेको छ । न्यूयोर्क टाइम्सका अनुसार यो यौनकाण्डमा फालवेल, उनकी पत्नी र पूल अटेन्डेन्ट मुछिएका छन् । लिबर्टी विश्वविद्यालयका शीर्ष अधिकारीहरु, जसलाई फलवेलले १ अर्ब ६० करोड डलर बराबरको इभान्जेलिकल शक्तिको केन्द्र बनाएका थिए, अहिले फालवेलको विश्वविद्यालयको अध्यक्ष र चान्सलर पदबाट बहिर्गमनको छिनोफानो गर्ने तयारीमा छन् ।

सोमबार राती विश्वविद्यालयका प्रवक्ताले समाचार संस्थाहरुसँग फलवेलले राजीनामा दिएको बताएपछि स्थिति अन्योलग्रस्त बनेको थियो । पछि फलवेलले आफूले राजीनामा दिएको कुराको खण्डन गरेका थिए । ‘फलवेलले अहिलेसम्म राजीनामा दिएका छैनन् तर उनले स्कुलसँग आफ्नो भविष्यबारे परामर्श गरिरहेका छन्’ छलफलका मुख्य व्यक्तिहरुको निकट रहेका तर आधिकारिक रुपमा वक्तव्य दिन अनुमति नपाएका एक व्यक्तिले न्यूयोर्क टाइम्ससँग भने । सोमबार राती फलवेलले भर्जिनिया बिजनेस नामको स्थानीय म्यागजिनसँग कुरा गर्दै आफ्नो राजीनामाको खबर पूरै गलत भएको बताएका थिए ।

सोमबार एक बिजनेस एसोसिएट जियांकार्लो ग्राण्डाले रोयटर्सलाई दिएको अन्तरवार्तामा आफू फलवेलकी श्रीमतीसँग वर्षौंसम्म यौन सम्बन्धमा रहेको खुलासा गरेपनि विवाद सुरु भएको थियो । ग्राण्डाले यो यौन सम्बन्धबारे फलवेललाई पनि जानकारी भएको बताएपछि फलवेल विवादमा तानिएका थिए ।