काठमाडौं। पक्राउ परेका १२ जना हङकङका अधिकारकर्मीलाई हङकङका अधिकारीले आफ्ना कानुन व्यवसायीलाई भेट्न नदिएको विषयमा अमेरिकाले आपत्ति जनाएपछि चीनले ती १२ जना अधिकारकर्मीलाई ‘पृथकतावादी’ घोषणा गरेको छ । साउथ चाइना मर्निङ पोस्टका अनुसार बेइजिङको विदेश मन्त्रालयले ती युवाहरुलाई ‘चीनबाट हङकङलाई टुक्र्याउन चाहने तत्व’ ठहर गरेको छ । यीमध्ये केही युवा गत वर्षको सरकारविरोधी प्रदर्शनसँग पनि सम्बन्धित छन् ।

‘उनीहरु आपराधिक हिरासतको अनिवार्य प्रावधान अनुसार राखिएका छन् । मुद्दाको अनुसन्धान भइरहेको छ । सार्वजनिक सुरक्षा अधिकारीहरुले कानुनअनुसार उनीहरुको कानुनी अधिकारको रक्षा गर्नेछन्’ शेनझेन पब्लिक सेक्युरिटी ब्यूरोको येन्तियान कार्यालयले जारी गरेको वक्तव्यमा उल्लेख छ । वक्तव्यमा पक्राउ परेका ११ पुरुष र १ महिला रहेको र उनीहरुको उमेर १६ वर्षदेखि ३३ वर्षसम्म रहेको पुष्टि गरिएको छ ।

पक्राउ परेकाका परिवारले भने उनीहरुका कानुन व्यवसायीलाई भेट्न नदिइएको बताएका छन् । चीनको विदेश मन्त्रालयकी प्रवक्ता हुवा चुनयिङले एक ट्वीटमा पक्राउ परेका १२ जना प्रजातान्त्रिक अभियन्ता नभएको बरु हङकङलाई चीनबाट अलग गर्न चाहने तत्व भएको भनेकी छिन् । पक्राउ परेका युवाका परिवारको दावीपछि अमेरिकाका विदेश मन्त्री माइक पोम्पियोले सेप्टेम्बर ११ मा पक्राउ परेकाहरुको विषयमा अमेरिका चिन्तित रहेको बताएका थिए ।