काठमाडौं। पाकिस्तानको इस्लामाबादस्थित अमेरिकी दूतावासले पाकिस्तानसँग माफी मागेको छ । पाकिस्तानी प्रधानमन्त्री इमरान खानविरुद्ध ट्वीटरमा पोस्ट गरिएको एक पोस्टलाई अमेरिकी दूतावासले रिट्वीट गरेको थियो । पाकिस्तानको विपक्षी दल पिएमएल–एनका नेता एहसान इकबालको एक ट्वीटलाई इस्लामाबादस्थित अमेरिकी दूतावासले रिट्वीट गरेपछि सामाजिक संजालमा ठूलो विरोध भएको थियो । पछि अमेरिकी दूतावासले यस विषयमा माफी मागेको हो ।

Dear Followers: The U.S. Embassy Islamabad Twitter account was accessed last night without authorization. The U.S. Embassy does not endorse the posting or retweeting of political messages. We apologize for any confusion that may have resulted from the unauthorized post.

— U.S. Embassy Islamabad (@usembislamabad) November 11, 2020

केही दिनदेखि पाकिस्तानमा वाशिङटन पोस्टमा प्रकाशित एक लेखको स्क्रिनशट भाइरल भइरहेको थियो जसमा डोनाल्ड ट्रम्पको हार विश्वभरका तानाशाहको लागि एक झट्का भएको भनिएको थियो । पिएमएल–एनका नेता इकबालले यही आर्टिकल शेयर गर्दै ‘हामीकहाँ पाकिस्तानमा पनि एक तानाशाह छन्, छिटै उनलाई बाहिर निकालिनेछ’ लेखेका थिए । इकबालको यही ट्वीट अमेरिकी दूतावासले रिट्वीट गरेको थियो ।

यससँगै अमेरिकी दूतावासले प्रोटोकल उल्लंघन गरेको भन्दै तीब्र विरोध भयो । ट्वीटरमा अमेरिकी दूतावासले माफी माग्नुपर्ने आवाज तीब्र भयो । यससँगै अमेरिकी दूतावासले माफी मागेको हो । दूतावासले माफी माग्दै लेखेको छ ‘अमेरिकी दूतावासको ट्वीटर अकाउण्ट हिजो राती ह्याक भएको थियो । अमेरिकी दूतावास राजनीतिक सन्देशहरु पोस्ट गर्ने र रिट्वीट गर्नुलाई समर्थन गर्दैन । यो अनाधिकारिक पोस्टबाट भएको कुनै पनि किसिमको विवादको लागि हामी माफी माग्छौं ।’