काठमाडौं। केही दिनअघि मात्र इण्डोनेसियाका एक युवकको घरको छाना फुटाउँदै खसेको उल्कापिण्डको टुक्रा १.८५ मिलियन डलर (झण्डै २१ करोड नेपाली रुपैयाँ)मा बिक्री भएको समाचार सार्वजनिक भएको थियो । यससँगै अन्तर्राष्ट्रिय मिडियामा ३४ वर्षका ती गरिब युवक करोडपति भएको भन्दै समाचार आएको थियो । तर, ती युवकले आफू करोडपति नभएको बताएका छन् । उनले द जाकार्ता पोस्टसँग कुरा गर्दै आफूले यति ठूलो रकम नपाएको बरु धोका पाएको बताएका छन् ।

जोसुआ हुतागालुङका अनुसार उनले त्यो ढुंगा २०० मिलियन रुपी (१७ लाख नेपाली रुपैयाँ) मा मात्र बिक्री गरेका थिए । उनले त्यो ढुंगाको मूल्य आफूले पाएको मूल्यको सय गुणाभन्दा धेरै भएको पछि मात्रै थाहा पाएका थिए । उनले आफूले त्यो ढुंगा त्यति सस्तोमा बेच्नु परेकोमा आफूले धोका पाएको महसुस भएको बताएका छन् । उनले त्यो ढुंगा अमेरिकी उल्कापिण्ड विशेषज्ञ जारेड कोलिन्सलाई बेचेका थिए ।

जोसुआका अनुसार उनीसँग अहिले त्यो ढुंगा बेचेर आएको २०० मिलियन रुपी पनि छैन । उनले त्यो पैसा परिवार र अनाथहरुलाई सहयोग गर्न, एउटा चर्च बनाउन, मातापिताको चिहान मर्मत गर्न खर्च गरिसकेका छन् । जोसुआका अनुसार १ अगष्टको दिन त्यो ढुंगा उनको छानो फुटाउँदै आएको थियो । भुइँमा खसेको त्यो ढुंगा तातो थियो र भुइँमा १५ सेन्टिमिटर धसिएको थियो । उनले यो ढुंगाबारे फेसबुकमा एउटा पोस्ट शेयर गरेका थिए । लगत्तै उनको पोस्ट भाइरल भएको थियो ।

त्यसको २ दिनपछि एक स्थानीयले उनलाई १ बिलियन रुपी दिने प्रस्ताव गरेका थिए तर जोसुआले उनलाई वास्ता गरेनन् किनकि उनी गम्भीर देखिँदैनथे । ती स्थानीयले हल्का रुपमा प्रस्ताव गरेकोले आफूले अस्वीकार गरेको जोसुआले बताए । २ हप्तापछि कोलिन्स बालीबाट जोसुआलाई भेट्न पुगेका थिए । उनले जोसुआलाई २०० मिलियन रुपी प्रस्ताव गरे । जोसुआले अस्वीकार गरेपछि कोलिन्सले जोसुआको भत्किएको छानो मर्मत गर्न भन्दै १४ मिलियन थपिदिए । त्यसपछि जोसुआले त्यो ढुंगा कोलिन्सलाई बेचेका थिए ।