काठमाडौं। भारतको बिहार राज्यको जहानाबादमा एक युवक यस्ता छन् जसले नीतीश कुमार हरेक पटक मुख्यमन्त्री बन्दा आफ्नो एउटा औंला काटेर भगवानलाई चढाउँछन् । जहानाबादका अनिल शर्मा नामका यी युवकले सोमबार आफ्नो चौथो औंला पनि काटेर गोरैया बाबाको मन्दिरमा चढाए । अनिल नीतीश कुमारका ठूला फ्यान हुन् र उनले हरेक पटक निर्वाचनपछि नीतीश मुख्यमन्त्री बन्दा औंला काट्ने गर्छन् ।

४५ वर्षका अनिल शर्मा उर्फ अली बाबाले यसअघि नीतीश मुख्यमन्त्री बन्दा आफ्ना तीन औंला काटिसकेका थिए । १६ नोभेम्बरमा नीतीशले मुख्यमन्त्रीको शपथ लिएपछि उनले फेरि अर्को औंला काटे । अनिल शर्माको यो लगाव देखेर त्यहाँका मानिसहरु भने अचम्ममा परेका छन् । अनिलले भने यसो गर्दा आफूलाई खुसी लाग्ने बताउँछन् । उनले यस पटक पनि गोरैया बाबासँग मुख्यमन्त्री नीतीश नै बनुन भनेर मागेका थिए । भगवानले आफ्नो प्रार्थना सुनेकाले आफूले औंला चढाएको उनले बताए ।