काठमाडौं। विश्वकै सबैभन्दा ठूलो सामाजिक संजाल अभियान चलाएर २६ अर्ब २० करोड रुपैयाँ जुटाउने पेट्रिक क्विनको ३७ वर्षको उमेरमा निधन भएको छ । पेट्रिक क्विनले २०१४ मा आइस बकेट च्यालेन्ज सुरु गरेका थिए । सामाजिक संजालमार्फत सुरु गरिएको यो अभियानबाट उनले एक दुर्लभ रोगबाट ग्रसित बिरामीहरुको उपचार र यो रोगसम्बन्धी अनुसन्धान गर्नको लागि २२० मिलियन डलर सहयोग उठाएका थिए । पेट्रिकको ३७ वर्षको उमेरमा आइतबार निधन भएको एएलएस फाउण्डेशनले जारी गरेको एक वक्तव्यलाई उद्धृत गर्दै सीएनएनले जनाएको छ ।

पेट्रिकले २०१४ मा सुरु गरेको आइस बकेट च्यालेन्जको उद्देश्य एम्योट्रोफिक लेटेरल स्क्लेरोसिस (एएलएस) नामको रोगबाट पीडित व्यक्तिहरुको उपचार गर्नु, यो रोगबारे अनुसन्धान गर्नु र यसबाट पीडिट बिरामीहरुको लागि औषधिको खोज र व्यवस्था गर्नु थियो । पेट्रिक आफू पनि यो दुर्लभ रोगबाट ग्रसित थिए । पेट्रिकलाई यो दुर्लभ रोग भएको ८ मार्च २०१३ मा थाहा भएको थियो । त्यसपछि उनले एएलएस एसोसिएसनसँग सम्पर्क गरेका थिए ।

एएलएस एसोसिएसन र पेट्रिक क्विनले मिलेर २०१४ मा आइस बकेट च्यालेन्ज सुरु गरेका थिए । सामाजिक संजालमा यो अभियान निकै लोकप्रिय भयो । यो अभियानबाट पेटिंक र एसोसिएसनले २२० मिलियन डलर धनराशी जम्मा गरेका थिए । यो रकमबाट अहिले यो रोगबाट पीडित बिरामीहरुको उपचार, रोगबार अनुसन्धान र यसको औषधिको खोजी कार्य भइरहेको छ । पेट्रिकको निधनको खबर एएलएस एसोसिएसनले ट्वीट गर्दै दिएपछि सामाजिक संजालमा उनको लागि श्रद्धाञ्जलीको बाढी आएको छ ।

अमेरिकाको सेन्टर फर डिजिज कन्टेल एण्ड प्रिभेन्सनका अनुसार अमेरिकामा मात्र १२ देखि १५ हजार मानिसहरु यो दुर्लभ रोगबाट पीडित छन् । ५ देखि १० प्रतिशत एएलएसको समस्या वंशाणुगत रुपमा हुन्छ । यसको कुनै पनि औषधि वा उपचार विधि छैन । ३७ वर्षीय पेट्रिकको निधन अमेरिकाको एक अस्पतालमा भयो जहाँ उनको उपचार भइरहेको थियो । पेट्रिकले सुरु गरेको आइस बकेट च्यालेन्जलाई विश्वभरीका हस्तीहरुले साथ दिएका थिए । अर्बपति बिल गेट्स, अमेरिकी पूर्व राष्ट्रपति जर्ज डब्लु बुश, हलिउड सुपरस्टार चार्ली शीन, आइस हकी खेलाडी बल बेसन्नेट जस्ता चर्चित हस्तीहरु यो अभियानमा सहभागी भएका थिए ।