काठमाडौं। अपरेशन थिएटरमा एक बिरामीको ओपन हर्ट सर्जरी भइरहेको बेलामा अचानक अस्पतालमा आगो लागेपछि डाक्टरहरुले आफ्नो ज्यान जोखिममै राखेर बिरामीको अपरेशन पूरा गरेका छन् । यो आगो निभाउन अग्नी नियन्त्रकहरुलाई करिब २ घण्टा लागेको थियो । यस क्रममा बिरामीको ज्यान बचाउन डाक्टरहरुले आफ्नै ज्यान जोखिममा पारेका हुन् ।

बीबीसीको रिपोर्टअनुसार रुसको सुदुर पूर्वी सहर ब्लागोभेन्स्चेकमा यो आगलागी भएको हो । दमकलकर्मीहरुका अनुसार उनीहरुलाई अस्पतालको अपरेशन थिएटरमा बिरामीको अपरेशन भइरहेको जानकारी दिइएपछि उनीहरुले अपरेशन थिएटरलाई सुरक्षित राख्न सक्दो प्रयास गरे । अपरेशन थिएटरमा धुवाँ नपुगोस् भन्नका लागि पंखाको प्रयोग गरिएको थियो । आगोका कारण विजुलीका तार ध्वस्त भइसकेका थिए । त्यसैले पंखा चलाउनको लागि अर्को ठाउँबाट बिजुलीको आपूर्ति गरिएको थियो । बिरामीको अपरेशन पूरा गर्न डाक्टर र नर्स गरी ८ जनाको टिम सक्रिय थियो ।

स्थानीय सरकारका प्रमुख भासिलिय ओर्लोभले स्थिति नियन्त्रणमा आएपछि भने ‘अस्पताल र अग्नी नियन्त्रकहरुको टिमको अगाडि हामी नतमस्तक छौं ।’ १९०७ मा बनेको यो अस्पतालमा दुर्घटनाको समयमा करिब १२८ जना मानिस थिए । सबैलाई त्यहाँबाट सुरक्षित निकालियो । आगोले तत्कालै अस्पताल भवनको काठले बनेको छत जल्न थालेको थियो तर भित्र भएका कसैलाई कुनै चोटपटक लाग्न पाएन ।