काठमाडौं। १६ वर्षका एक नाबालिग किशोरले आधा रातमा ९१ वषृकी एक वृद्धाको घर फुटाएर घरभित्र पसेर महिलालाई बलात्कार गर्ने प्रयास गरेको आरोप लागेको छ । ती किशोरले बिहीबार मध्य रात हुनुभन्दा केही समयअघि वृद्धा घरमा निदाइरहेको बेला अस्ट्रेलियाको एडिलेडमा वृद्धाको घर फुटाएर भित्र पसेर बलात्कारको प्रयास गरेको बताइएको छ ।

एडिलेड युवा अदालतमा किशोरलाई पेश गरिएको छ । अदालतमा सुनुवाइमा उनले कसरी घर फुटाएर भित्र पसे र कसरी वृद्धा महिलालाई बलात्कार गर्ने प्रयास गरे भन्ने बताइएको छ । कानुनी कारणले उनको पहिचान खुलाइएको छैन । किशोरले बलात्कारको प्रयास गरेपछि महिला बिउँझिएर चिच्याउन थालेकी थिइन् त्यसपछि किशोर त्यहाँबाट भागेको सेभेन न्यूजले जनाएको छ ।

किशोरलाई शनिबार दिउँसो सहरको दक्षिणी क्षेत्रबाट विशेष अपराध अनुसन्धानका एजेन्टहरुले पक्राउ गरेका थिए । किशोर भागेपछि महिला घरमा एक्लै फेरि आक्रमण हुने डरमा बसेकी थिइन् । अहिले भने उनी परिवारका सदस्यहरुको साथमा बसिरहेकी छिन् । किशोरलाई २ हप्तापछि अर्को सुनुवाइसम्मको लागि हिरासतमा राखिनेछ ।