काठमाडौं। कोरोनाभाइरसको पहिलो संक्रमित मानिस अर्थात ‘प्यासेन्ट जीरो’ को खोजी गरिरहेका विश्व स्वास्थ्य संगठनका अधिकारीहरु अनुसन्धानको क्रममा एक रहस्यमय इटलियन महिलासम्म पुगेका छन् । यी महिलाको त्वचाको नमूनाबाट उनी चीनको वुहानमा संक्रमण फैलिनुभन्दा हप्तौं पहिले कोरोनाभाइरसबाट संक्रमित भएको पाइएको छ ।

२५ वर्षकी यी महिला घाँटी दुख्ने र छालामा घाउ हुने समस्या भएपछि २०१९ को नोभेम्बरमा मिलानको एक अस्पताल गएकी थिइन् । त्यसको एक महिनापछि मात्रै चीनमा कोरोनाभाइरसको पहिलो केस रिपोर्टिङ गरिएको थियो । जनवरीमा प्रकाशित एक शोधपत्रका अनुसार यी महिलाको छालाको सानो नमूनामा भाइरसका ट्रेसेजहरु पाइएको वाल स्ट्रिट जर्नलले जनाएको छ ।

विश्व स्वास्थ्य संगठन नेतृत्वको टोलीका सदस्यहरु यी २५ वर्षकी महिलाको केसले वुहानमा फैलिनुभन्दा पहिल्यै मानिसमा कोरोना थियो भन्ने पुष्टि भएको बताउँछन् र यस विषयमा थप अनुसन्धान आवश्यक रहेको बताउँछन् । अहिलेको सबैभन्दा ठूलो समस्या यी महिलाको पहिचान थाहा नहुनु हो ।

मिलानको पोलिक्लिनिको हस्पिटल र युनिभर्सिटी अफ मिलानले उनको केस हेरेका थिए तर दुवैले महिलाको बारेमा थप जानकारी नभएको बताएका छन् । महिलाको उपचार गरेका डाक्टर राफेले गियानोट्टीको मार्चमा मृत्यु भयो । डब्लुएचओको टोली उनीसम्म पुग्नुभन्दा केही दिन अघिमात्र उनको मृत्यु भएको थियो ।