काठमाडौं। भारतीय राष्ट्रिय क्रिकेट टिमको टि–२० फरम्याटको कप्तान पदबाट राजीनामा दिएका विराट कोहलीले अब आइपिएल टिम रोयल च्यालेन्जर्स बैंगलोरको कप्तान पदबाट समेत राजीनामा दिएका छन् । गएराति रोयल च्यालेन्जर्स बैंगलोरले ट्वीट गर्दै विराट कोहलीले कप्तान पदबाट हट्ने निर्णय गरेको जानकारी दिएको हो । यद्यपि आइपिएलको जारी सिजनमा भने उनी नै कप्तान रहनेछन् । आइपिएलको जारी सिजन सकिएसँगै उनी कप्तानबाट हट्नेछन् ।

कोहलीले भनेका छन् ‘आरसीबीको कप्तानको रुपमा यो मेरो अन्तिम आइपिएल हुनेछ । म आफ्नो अन्तिम खेल खेल्दासम्म आरसीबीको खेलाडी बनिरहनेछु । ममाथि विश्वास गरेको र। मेरो समर्थन गरेकोमा म आरसीबीका सबै प्रशंशकलाई आभार व्यक्त गर्न चाहन्छु ।’ यससँगै कोहलीले आइपिएलमा अब कहिल्यै पनि अर्को फ्रेन्चाइजको लागि नखेल्ने समेत स्पष्ट पारेका छन् ।

Virat Kohli to step down from RCB captaincy after #IPL2021

“This will be my last IPL as captain of RCB. I’ll continue to be an RCB player till I play my last IPL game. I thank all the RCB fans for believing in me and supporting me.”: Virat Kohli#PlayBold #WeAreChallengers pic.twitter.com/QSIdCT8QQM

— Royal Challengers Bangalore (@RCBTweets) September 19, 2021

कोहलीले अगाडि भने ‘प्रतिभाशाली खेलाडीहरुले भरिएको आरसीबीको कप्तानी गर्नु शानदार र प्रेरक यात्रा रह्यो । म यो अवसरमा आरसीबीलाई धन्यवाद दिन चाहन्छु । प्रबनधन, कोच, सहयोगी स्टाफ, खेलाडी र पूरै आरसीबी परिवारले कैयौं वर्षदेखि महत्वपूर्ण भूमिका निभाएका छन् । यो सजिलो निर्णय थिएन । आरसीबी मेरो मनको नजिक छ किनकि हामीले उत्कृष्टता हासिल गर्ने प्रयास जारी राख्नु छ ।’

आरसीबीले पनि एक बयान जारी गर्दै भनेको छ ‘विराट कोहलीले आइपिएल २०२१ पछि कप्तानको रुपमा आफ्नो भूमिकाबाट हट्ने निर्णय गरेका छन् । कोहली फ्रेन्चाइजका सबैभन्दा शानदार खेलाडीमध्ये एक हुन् । उनी आरसीबी टिमको हिस्सा रहिरहनेछन् ।’ कोहलीले यसअघि १६ सेप्टेम्बरका दिन भारतको राष्ट्रिय टिमको टि–२० फरम्याटमा कप्तान पदबाट हट्ने निर्णय गरेका थिए । उनले आगामी टि–२० विश्वकपपछि राष्ट्रिय टिमको टि–२० कप्तानी छाड्ने घोषणा गरेका थिए ।