काठमाडौँ। नेपाल राष्ट्र बैंकले ८ अर्ब २३ करोड रूपैयाँ बराबरको ट्रेजरी बिल बिक्री गर्ने भएको छ । केन्द्रीय बैंकले ९१ दिन अवधिका लागि २ अर्ब २३ करोड ३२ लाख रुपैयाँ र १८२ दिनका लागि ६ अर्ब रुपैयाँ बराबरको ट्रेजरी बिल बोलकबोल प्रक्रियाबाट बिक्री गर्न लागेको हो।

ट्रेजरीको बोलकबोल साेमबार दिउँसो ३ बजे अनलाइनमार्फत् खुला हुनेछ। ९१ दिने ट्रेजरी आगामी जेठ १० गते परिपक्व हुनेछ भने १८२ दिने ट्रेजरी आगामी वर्ष भदौ ७ गते परिपक्व हुने राष्ट्र बैंकले जनाएको छ ।

बोलकबोलमा सहभागी हुने क, ख र ग वर्गका बैंक, अन्य वित्तीय संस्था, गैरबैंक तथा वित्तीय संस्थालगायतलाई राष्ट्र बैंकले मंगलबार ट्रेजरी बिल जारी गर्नेछ। राष्ट्र बैंकले सरकारलाई आवश्यक पर्ने अल्पकालीन ऋण उठाउन बोलकबोल प्रक्रियामार्फत् ऋणपत्र बिक्री गर्ने गर्दछ।