काठमाडौं । महेन्द्र सिंह धोनीले ४० वर्षको उमेरमा पनि क्रिकेटमा राम्रो प्रदर्शन गरिरहेका छन् । उनले एकपटक फेरि प्रमाणित गरिसकेका छन् कि उमेर संख्या मात्र हो । उनले फेरि कप्तानी सम्हाल्दै चेन्नई सुपर किंग्स टोलीलाई जितको बाटोमा ल्याएका छन् । धोनीले दिल्ली क्यापिटल्सविरुद्ध पनि राम्रो ब्याटिङ गरे ।

तर, यो म्याचको एउटा तस्बिर पनि भाइरल भएको छ, जसमा धोनी आफ्नो ब्याट खाइरहेको देखिन्छ । धोनीले मुखमा ब्याट समातेको यो पहिलो पटक भने होइन । यसअघि पनि उनी धेरै पटक ब्याट खाएको देखिएका छन् । धोनीले किन यस्तो गर्छन् भन्ने खुलासा उनको टिम इन्डियाका साथी अमित मिश्राले गरेका छन् ।

लेग स्पिनर अमित मिश्राले सामाजिक सञ्जालमा एक पोस्ट सेयर गर्दै यो खुलासा गरेका हुन् । अमितले आफ्नो पोस्टमा लेखेका छन्, ‘यदि तपाई सोचिरहनु भएको छ कि धोनीले आफ्नो ब्याट किन खाइरहेका छन् भने हामी तपाईलाई भनौं कि उनले आफ्नो ब्याटबाट टेप निकालिरहेका छन् । उनलाई आफ्नो ब्याट सफा राख्न मन पर्छ। तपाईंले धोनीको ब्याटमा एउटै धागो वा टेप बाहिर निस्किएको देख्नुहुने छैन।’

In case you’re wondering why Dhoni often ‘eats’ his bat. He does that to remove tape of the bat as he likes his bat to be clean. You won’t see a single piece of tape or thread coming out of MS’s bat. #CSKvDC #TATAIPL2022

— Amit Mishra (@MishiAmit) May 8, 2022

अमित मिश्राले यसपटक आईपीएल खेलिरहेका छैनन् । उनलाई मेगा लिलामीमा कसैले किनेको थिएन । यद्यपि, उनले दिल्ली टोलीका मालिक पार्थ जिन्दललाई भनेका थिए कि उनी टोलीका लागि कुनै पनि भूमिकामा उपलब्ध हुन सधैं तयार छन्। आईपीएल नखेल्दा अमित मिश्रा यतिबेला सामाजिक सञ्जालमा निकै सक्रिय छन् ।

चेन्नईले आइतबार नै दिल्लीको टोलीसँग खेलेको थियो । खेलमा टस हारेर पहिले ब्याटिङ गरेको चेन्नईले ६ विकेट गुमाएर २०८ रन जोडेको थियो । टोलीका लागि डेभोन कोनवेले ४९ बलमा ८७ र ऋतुराज गायकवाडले ३३ बलमा ४१ रन बनाए ।

२०९ रनको लक्ष्यको जवाफमा दिल्ली क्यापिटल्सको सुरुवात राम्रो हुन सकेन र टोलीले ३६ रनमा दुई विकेट गुमाएको थियो । अन्त्यमा दिल्लीको टोली ११७ रनमा मात्रै सिमित भयो र ९१ रनले पराजित भयो । मिचेल मार्सले २५ र शार्दुल ठाकुरले २४ रन बनाए । कुनै पनि ब्याट्सम्यानले ३० रन बनाउन सकेनन् । खेल जित्ने इनिङ्सका लागि कोनवे प्लेयर अफ द म्याच घोषित भए।