काठमाडौं । स्टार फुटबलर क्रिस्टियानो रोनाल्डोले साउदी अरेबियाको क्लब अल–नासरबाट आफ्नो पहिलो खेल खेल्नको लागि केही समय कुर्नु पर्ने भएको छ । रोनाल्डो अहिले इङ्लिस फुटबल संघ (एफए) बाट दुई खेलको प्रतिबन्धको सामना गरिरहेका छन् ।

रोनाल्डोले आफ्नो पहिलो खेल बिहीबार साउदी प्रो लिग क्लब अल-ताईसँग खेल्नेवाला थिए। ३७ वर्षीय रोनाल्डोले यसै साता साउदी क्लब अल–नासरसँग अनुबन्ध गरेका थिए । यसका लागि उनलाई सन् २०२५ सम्म हरेक वर्ष करिब २० करोड युरो दिइनेछ ।

रोनाल्डो यसअघि म्यानचेस्टर युनाइटेड क्लबबाट खेल्थे । गत सोमबार साउदी अरेबियाको राजधानी रियाद पुगेका उनलाई भव्य स्वागत गरिएको थियो । भोलिपल्ट अर्थात मंगलबार अल–नासर क्लबको घरेलु मैदानमा उनको विधिवत स्वागत गरिएको थियो ।

रोनाल्डोले आफ्ना नयाँ क्लब साथीहरूसँग प्रशिक्षण सत्रमा पनि भाग लिए। रोनाल्डोले आफ्नो पहिलो खेल शुक्रबार (जनवरी ०६) खेल्नेछन् भन्ने अल-नासरलाई पूर्ण आशा थियो। यो खेलको २८ हजार टिकट पनि बिक्री भएको थियो ।

तर त्यसपछि अल-नासरलाई बताइयो कि नोभेम्बरमा इङ्लिस फुटबल संघले रोनाल्डोलाई दुई खेलको प्रतिबन्ध लगाएको थियो। यो प्रतिबन्ध अप्रिलमा खेलिएको एक खेलपछि भएको घटनाका कारण लगाइएको हो । रोनाल्डोले आफ्ना एक समर्थकको फोन हातबाट खसालिदिएका थिए ।

किन लगाइयो प्रतिबन्ध ?

जसको फोन रोनाल्डोले खसालिदिएका थिए उनी अटिस्टिक थिए । यसका लागि रोनाल्डोले माफी पनि मागेका थिए तर उक्त व्यक्तिले माफी स्वीकार गर्न अस्वीकार गरेका थिए ।

म्यान्चेस्टर युनाइटेड खेलमा ०-१ ले पराजित भयो र खेल पछि रोनाल्डो खेलाडीहरू जानका लागि बनाइएको सुरुङ पार गर्दै थिए । त्यही क्रममा उनले आफ्नो हातले हानेर एक युवकको हातबाट मोबाइल खसालिदिएका थिए ।

यसका लागि प्रहरीले रोनाल्डोलाई चेतावनी समेत दिएको थियो । रोनाल्डोले पछि सामाजिक सञ्जालमा माफी मागेका थिए र ओल्ड ट्राफोर्ड स्टेडियममा हुने खेल हेर्न आफ्ना ती समर्थकलाई अतिथिको रूपमा निम्तो पनि दिएका थिए।

यस घटनाका सम्बन्धमा रोनाल्डोले भनेका थिए, कठिन परिस्थितिमा आफ्नो भावनालाई नियन्त्रण गर्न सजिलो छैन, तर यत्तिका बाबजुद पनि हामीले सम्मानजनक तरिका अपनाएर यो सुन्दर खेललाई माया गर्ने युवाहरूका लागि उदाहरण पेश गर्नुपर्छ।

तर १४ वर्षीय अटिस्टिक ज्याकले रोनाल्डोको प्रस्ताव अस्वीकार गरे र उनको माफी पनि स्वीकार गरेनन्। फुटबल विश्वकपका कारण रोनाल्डोलाई प्रतिबन्ध लाग्न नसकेकाले अब उसले आफ्नो नयाँ क्लबमा त्यो प्रतिबन्ध खेप्नु पर्नेछ ।

फिफाको नियम के हो ?

फिफाको कानुन अनुसार कुनै खेलाडीलाई चार खेल वा तीन महिनाको प्रतिबन्ध लगाइएको भएमा र उसको स्थानान्तरण भएकोले कार्यान्वयन हुन नसकेमा त्यो खेलाडीले नयाँ सम्झौता गरेको नयाँ क्लबमा त्यो प्रतिबन्ध लागु गर्नु अनिवार्य हुन्छ ।

त्यतिबेला एफएले रोनाल्डो पुरानै क्लबमा बसेमा वा अर्को क्लबमा सरुवा भए पनि जुनसुकै हालतमा प्रतिबन्ध लागु हुने बताएको थियो ।

अल-नासर क्लबको अर्को खेल जनवरी १४ र त्यसपछि २१ जनवरीमा हुनेछ। त्यसैले रोनाल्डोले आफ्नो नयाँ क्लबसँगको पहिलो खेल २१ जनवरीमा मात्र खेल्न सक्ने अपेक्षा गरिएको छ । अल-नासरको खेल इत्तफाक क्लबसँग २१ जनवरीमा हुनेछ।

रोनाल्डोलाई ‘साउदी स्पोर्ट्स वाशिङ’को हिस्सा नबन्न आग्रह

विश्वभरका मानवअधिकार उल्लङ्घनका घटनाको अनुगमन गर्ने संस्था एम्नेस्टी इन्टरनेशनलले रोनाल्डोले साउदी अरेबियामा भएको मानवअधिकार उल्लङ्घनको बारेमा कुरा गर्नुपर्ने बताएको छ ।

एम्नेस्टीले रोनाल्डोसँग सम्झौता गर्ने अल-नासर क्लबको निर्णय वास्तवमा स्पोर्टस वाशिङका सम्बन्धमा साउदी अरब सरकारको फराकिलो नीतिको हिस्सा भएको भन्दै विज्ञप्ति जारी गरेको छ।

साउदी अरेबियामा रोनाल्डोको उपस्थितिलाई सार्वजनिक गरेर साउदी शासनले देशको मानवअधिकारको भ्रष्ट रेकर्डबाट ध्यान हटाउन सक्षम हुन सक्छ। रोनाल्डोले आफ्नो लोकप्रियता र सेलिब्रेटीको हैसियतलाई ‘साउदी स्पोर्ट्स वाशिङ’ को हतियार बन्न दिनुहुँदैन।

रोनाल्डोको स्टार पावर यस्तो छ कि गत हप्तासम्म अल-नासर क्लबको इन्स्टाग्राममा मात्र पाँच लाख फलोअर्स थिए, अहिले ९.१ मिलियन फलोअर्स छन् । साउदी अरबमा पनि मानिसहरुले रोनाल्डोको अभ्यासको भिडियो सामाजिक सञ्जालमा पोस्ट गर्दै उनको प्रशंसा गरिरहेका छन् ।