काठमाडौं । लश्कर-ए-तैयबा (एलईटी) का नेता अब्दुल रहमान मक्कीलाई विश्वव्यापी आतंककारीको सूचीमा समावेश गर्ने निर्णयको भारतले स्वागत गरेको छ। चीनले पनि यस विषयमा प्रतिक्रिया दिँदै ‘आतंकवाद मानवताको साझा शत्रु हो’ भनेको छ ।

भारतको विदेश मन्त्रालयका प्रवक्ता अरिन्दम बागचीले भने, “हामी संयुक्त राष्ट्र सुरक्षा परिषद्को आईएसआईएल र अलकायदा प्रतिबन्ध समितिले लश्कर-ए-तैयबा (एलईटी) आतंकवादी अब्दुल रहमान मक्कीलाई विश्वव्यापी आतंकवादको रूपमा सूचीकृत गर्ने निर्णयको स्वागत गर्दछौं।”

बागचीले भने, “उनी लश्करका नेता हाफिज सईदका आफन्त पनि हुन्। मक्कीले लश्कर नेतृत्वसँग सम्बन्धित धेरै भूमिका खेलेका छन्। उनले यस संगठनको लागि कोष पनि उठाइरहेका छन्।”

उनले थपे, “आतंकवादी संगठनहरू यस क्षेत्रमा सधैं ठूलो खतरा भएका छन्। संयुक्त राष्ट्र सुरक्षा परिषद्को सूचीकरण र (आतंकवादीहरूलाई) प्रतिबन्ध लगाउनु त्यस्ता खतराहरूलाई रोक्न र यस क्षेत्रमा आतंकका पूर्वाधारलाई ध्वस्त पार्ने उद्देश्य प्राप्तिका लागि प्रभावकारी कदमहरू हुन्।”

‘बागचीले भने, “भारत आतंकवादप्रति शून्य सहनशीलताको नीतिमा प्रतिबद्ध छ र आतंकवाद विरुद्ध विश्वसनीय, प्रामाणिक र अपरिवर्तनीय कदम चाल्न अन्तर्राष्ट्रिय समुदायलाई दबाब दिन जारी राख्नेछ।”

मक्कीलाई विश्वव्यापी आतंकवादी घोषणा गर्ने विषयमा चीनले ‘टेक्निकल होल्ड’ (प्राविधिक रोक) हटाउने विषयमा भनेको छ, ‘आतंकवाद मानवताको साझा शत्रु हो।’ समाचार एजेन्सी पीटीआईका अनुसार चिनियाँ विदेश मन्त्रालयका प्रवक्ता वान वेनबिनले भने, ‘आतंकवाद रोक्नको लागि पाकिस्तानको प्रयासको पनि प्रशंसा गर्नुपर्छ।’