काठमाडौं । भारतीय धितोपत्र तथा विनिमय बोर्ड अर्थात सेबीले लगाएको प्रतिबन्धपछि अभिनेता अर्शद वारसीको प्रतिक्रिया आएको छ ।

अर्शद वारसीले ट्वीट गर्दै भनेका छन्, ‘समाचारमा पढेका सबै कुरामा विश्वास नगर्नुहोस्। श्रीमती मारिया र मसँग शेयर बजारको शून्य बुझाइ छ। हामीले सल्लाह लिएर शारदामा लगानी गर्यौं । अरू धेरैजस्तै हामीले पनि हाम्रो मेहनतको पैसा गुमायौं।’

बुधबार फिल्म अभिनेता अर्शद वारसी र उनकी श्रीमतीलाई भारतीय धितोपत्र तथा विनिमय बोर्ड अर्थात सेबीले प्रतिबन्ध लगाएको थियो । यो प्रतिबन्ध सेयर पम्प र डम्प प्रकरणसँग सम्बन्धित छ।

Please do not believe everything you read in the news. Maria and my knowledge about stocks is zero, took advice and invested in Sharda, and like many other, lost all our hard earned money.

— Arshad Warsi (@ArshadWarsi) March 2, 2023

‘सेयर पम्प एण्ड डम्प’ भन्नाले शेयरको मूल्य बढाउने वा घटाउने उद्देश्यले गलत सूचना दिनु हो ।

समाचार एजेन्सी पीटीआईका अनुसार सेबीले ३१ कम्पनी र फर्मलाई प्रतिबन्ध लगाएको छ । जसमा अर्शद वारसी, उनकी पत्नी मारिया गोरेटी र साधना ब्रोडकास्टसँग सम्बद्ध प्रवर्तकहरू पर्छन्।

लगानीकर्ताले सेयर किन्न सकून् भनेर यी व्यक्तिहरूले गलत सूचनासहितको भिडियो युट्युबमा अपलोड गरेको आरोप छ ।