काठमाडौं । बलिउड अभिनेता रणवीर सिंह ती कलाकार मध्ये एक हुन् जो आफ्नो अभिनयका लागि मात्र होइन आफ्नो अनौठो स्टाइलका लागि पनि परिचित छन् । फेसन सेन्स होस् वा फोटोसुट, उनी कुनै न कुनै कारणले हेडलाइनमा रहन्छन्। अब उनको नाममा ठूलो उपलब्धि थपिएको छ । वास्तवमा, क्रोलको रिपोर्ट अनुसार, २०२२ मा रणवीर सिंह स्टार क्रिकेटर विराट कोहलीलाई पछि पार्दै भारतको मोस्ट भ्यालुएबल सेलिब्रेटी बनेका छन्।

कर्पोरेट इन्भेस्टिगेशन एण्ड रिस्क कन्सल्टिङ फर्म क्रोलको हालै जारी गरिएको रिपोर्टले देशका धनी सेलिब्रेटीहरूको सूची सार्वजनिक गरेको छ। यस अनुसार बलिउड अभिनेता रणवीर सिंह सन् २०२२ मा १८१.७ मिलियन डलरको ब्रान्ड भ्यालुका साथ भारतको सबैभन्दा मूल्यवान स्टार बनेका छन् । यस बाहेक अभिनेत्री आलिया भट्ट यस सूचीमा सबैभन्दा मूल्यवान् महिला सेलिब्रेटीको रूपमा उभिएकी छिन् । उनको ब्रान्ड मूल्य १०२.९ मिलियन डलर छ।

विराट कोहली विगत पाँच वर्षदेखि देशकै सबैभन्दा मूल्यवान सेलिब्रेटी बनेका थिए तर अहिले उनले यो ताज गुमाएपछि उनी दोस्रो नम्बरमा झरेका छन् । सेलिब्रेटी ब्रान्ड मूल्याङ्कन रिपोर्ट २०२२ : बियन्ड द मेनस्ट्रीम रिपोर्टमा कोहलीको ब्रान्ड मूल्य १७६.९ मिलियन डलर छ। यसअघि सन् २०२० मा विराट कोहलीको ब्रान्ड भ्यालु २३७ मिलियन डलर थियो भने २०२१ मा १८५.७ मिलियन डलर थियो । रणवीर सिंहको ब्रान्ड मूल्य एक वर्ष अघिको तुलनामा करिब २९ प्रतिशतले बढेको छ । रणवीरको २०२१ को ब्रान्ड मूल्य १५८.३ मिलियन डलर थियो।

अभिनेता अक्षय कुमार १५३.६ मिलियन डलरको ब्रान्ड भ्यालुका साथ क्रोलको सूचीमा तेस्रो स्थानमा छन् । जबकि आलिया भट्ट १०२.९ मिलियन डलरको साथ चौथो नम्बरमा छिन् । दीपिका पादुकोण ८२.९ मिलियन डलरसहित पाँचौं स्थानमा छिन् । यसका अलावा अमिताभ बच्चन, ऋतिक रोशन, पूर्व क्रिकेटर एमएस धोनी, सचिन तेन्दुलकर र शाहरुख खान पनि शीर्ष १० मूल्यवान सेलिब्रेटीमा परेका छन् ।

साउथ फिल्म उद्योगका स्टार अल्लु अर्जुन र अभिनेत्री रश्मिका मन्डन्ना पहिलो पटक टप–२५ मा प्रवेश गरेका छन् । अल्लु अर्जुन ३१.४ मिलियन डलरको ब्रान्ड भ्यालुका साथ २०औं स्थानमा छन् भने रश्मिका मन्डन्ना २५.३ मिलियन डलरको ब्रान्ड भ्यालुका साथ २५औँ स्थानमा छन्। ओलम्पिक स्वर्ण पदक विजेता नीरज चोपडा पनि भारतका धनी सेलिब्रेटीहरूको सूचीमा परेका छन् र उनी २६.५ मिलियन डलरको ब्रान्ड मूल्यका साथ २३ नम्बरमा छन्।