काठमाडौं । नेकपा एमालेका अध्यक्ष केपी ओलीले सबै पार्टीहरुलाई एकै ठाउँ राखेर हेर्न नहुने बताएका छन् ।

एमाले सम्पर्क समन्वयन कमिटिले शनिबार काठमाडौंमा आयोजना गरेको शुभकामना आदान प्रदान कार्यक्रममा ओलीले धेरै पार्टीहरुलाई एकै ठाउँ राखेर हेर्न नहुने र राम्रालाई राम्रो र नराम्रालाई नराम्रो भन्न सक्नुपर्ने बताएका छन् ।

उनले सबै नेताहरुलाई आरोप र आशंका दृष्टिले हेर्दा समाज ठिक ठाउँमा जान नसक्ने बताए । ओलीले चाडपर्वलाई भ्रमबाट दुर गर्ने, चेतनाको प्रकाश पुराउने माध्यमको रुपमा लिनुपर्ने धारणा पनि राखे ।

चाडपर्वको समयलाई व्यक्तिगत ज्ञान बढाउनका लागि उपयोग गर्नुपर्नेमा उनले जोड दिए ।