हे सन्दुक!
नौ महिना प्रकृतिले
हिमसिरक ओडाउने तिम्रो त्यो न्यानो र प्यारो गाउँ ओलाङ्चुङ्गोला
न बिजुली, न बाटो, न विद्यालय, न स्वास्थ्य, न संचार
तिम्रा माता पिताले
कसरी तिमीहरुलाई पढाए?
कसरी हुर्काए, बढाए?
कतिलाई गुमाए?
कतिलाई बचाए!
परिवारमा उपचार खर्च नभई,
गाउँमा स्वास्थ्य सेवा नहुँदाको पीडाले
बाल्यकालको प्रिय साथी र बहिनी
याङ्लाको असामयिक निधनको
पीडादायक वियोगसँगै
तिमीले चिकित्सक बन्ने संकल्प जगायौ
गरिबहरूलाई सेवा गर्ने भावना जन्मायौ
र
पुन जन्मियौ त्यही
यस धर्तीमा कर्मवीर भएर
त्यही सृष्टि भित्र दृष्टि लिएर
सेवा र कल्याणको अन्तर्दृष्टि लिएर
त्यसैको शाश्वत अविनाशी ज्योतिलिएर
लामो संघर्षको कथालाई चिर्दै
आफैंलाई नेत्रको चिकित्सक बनायौ!

इन्स्टाकुलर लेन्सको आविष्कारले विज्ञानलाई सजायौ
समयसँग एक क्रान्तिकारी अभियानको उद्घोष गरायौ
र
विश्वलाई नै एक नयाँ दृष्टि दियौ
हजारौँ अस्थायी शिविरहरूको माध्यमले घरघरमा सेवा पुर्‍यायौ

जीवनभित्रको अन्तर्जीवनमा आत्मसम्मान जगायौ
लाखौं, करोडौं मानिसको जीवन र सोचमा नयाँ चेतना जन्मायौ
परिवर्तनको लागि अभियान चलायौ
सबैमा प्रेरणा जगायौ
देश र समाजलाई
दाता नखोज
आफै स्वावलम्बी बन भन्ने सन्देश दिलायौ
दुर्गम ठाउँ स्वयंमा बाधा बन्दैन
गरीब भनिएको मान्छे गरिब हुँदैन
ऊ! त्यो मान्छे!
अठोटको संघर्षशील, सिर्जनशील मान्छे
सोच र सिर्जनामा सधैँ धनी हुन्छ भनेर
तिमीले विश्वलाई देखायौ
अथक परिश्रम, प्रयास र
एक उद्देश्यको लागि एकोहारो समर्पणले
असम्भव पनि सम्भव हुन्छ भनेर देखायौ

रामोन म्याग्सेसे, ईसा, पद्मश्री, एशिया गेम चेन्जर,
द अर्डर अफ अस्ट्रेलिया
लगायत
धेरै धेरै सम्मानित पुरस्कारहरूबाट सम्मानित भई
नेपाल अनि नेपालीको पहिचान,गौरव र गरिमा उठाउने
तिमी
विश्व मानवताको उच्चाइको प्रतीक र उदाहरण तिमी
नन्दारुईतको साथले
हजारौं लाखौंको हराएको हाँसो ल्याइदिने
जीवनको खुशी तिमी
निराशामा बसेका लागि आशा र विश्वास दिने तिमी
गरिबीले छटपटाइरहनेहरूका लागि सहारा र भरोसा तिमी
अन्योलमामा अल्झिरहेकाहरूका लागि
सम्भावनाको बाटो देखाउने, पथ प्रदर्शक तिमी
हार्दिकता, मानवता र करुणाको परिभाषा र परिचय
तिमी
अँध्यारोमा हराइरहेकाहरूका लागि
दियो
प्रकाश
बत्ती
अनि
ज्योतिर्मय ज्योति हौ तिमी
एक नवअवतार हौ !
एक परिचय नव महामानवताको
मानिसलाई सुन्दर संसार देखाइदिने
तिमी दृष्टि देवता मात्र होइन
तिमी देवदूत हौ
तिमी स्वयं देवता हौ
स्वयं देवता हौ !
स्वयं देवता हौ तिमी
तिमीलाई हार्दिक हार्दिक अभिवादन !
तिमीलाई लाखौं लाख बन्दना !
लाखौं लाख बन्दना !!

( डा. सन्दुक रूईतलाई मे १७ २०२५ भर्जिनियामा भेटेर आभार व्यक्त गरौं , अभियानमा सहभागी बनौँ !)