काठमाडौं । रोयल च्यालेन्जर्स बैंगलोरको उत्सवको क्रममा भागदौड भएको घटनामा संलग्न रहेको आरोपमा बेंगलुरु प्रहरीले दुई अधिकारीलाई पक्राउ गरेको छ।

यी दुवै अधिकारीहरूलाई शहर छोड्न खोज्दा विमानस्थलमा पक्राउ गरिएको थियो। आरसीबी व्यवस्थापन टोलीका निखिल सोसाले र डीएनए कार्यक्रम व्यवस्थापनका सुनील म्याथ्यूलाई पक्राउ गरिएको छ।

एक प्रहरी अधिकारीले बीबीसी हिन्दीलाई भने, “यस मुद्दामा अझै धेरै पक्राउ पर्नेछन्।”

एफआईआर दर्ता भएपछि र राज्य सरकारले आरसीबी, कर्नाटक क्रिकेट संघ र डीएनए इभेन्ट म्यानेजमेन्ट कम्पनी विरुद्ध कडा कारबाही गर्ने निर्णय गरेपछि यी दुवै पक्राउ परेका हुन्।

यी दुवै अधिकारीमाथि नि:शुल्क पासको घोषणा गरेर भीड जम्मा गरेको आरोप छ।

कर्नाटकका मुख्यमन्त्री सिद्धरामय्याले हिजो राति तीन संस्थासँग सम्बन्धित अधिकारीहरूलाई पक्राउ गर्नुपर्ने घोषणा गरेका थिए।

बेंगलुरुमा १८ वर्षपछि आरसीबी टोलीले आईपीएल जितेको उत्सवमा भागदौड मच्चिएपछि यो निर्णय लिइएको हो।

पक्राउ परेकाहरूलाई आरसीबीको सामाजिक सञ्जाल ह्यान्डल र वेबसाइटमा विधानसभा भवनदेखि कर्नाटक क्रिकेट संघसम्म टोलीको विजय परेड र रंगशालामा नि:शुल्क पासको बारेमा जानकारी पोस्ट गरेको आरोप लगाइएको छ।