काठमाडौं । इरानका निर्वासित नेता तथा १५ वर्षदेखि न्यु इरान आन्दोलनको नेतृत्व गर्दै आएका इमान फोरौटनले इजरायली आक्रमणका कारण इरानमा चाँडै शासन परिवर्तन हुने बताएका छन्। उनले धेरै सेलिब्रेटीहरूले इरान छोडेको र आगामी समयमा देशका सर्वोच्च नेता खामेनीले पनि देश छोड्ने विकल्प छनौट गर्न सक्ने दाबी गरेका छन्।

उनले भने ‘इजरायली आक्रमणबाट इरान डगमगाएको छ र इरानी जनता उत्सव मनाइरहेका छन्। किनभने उनीहरूले यसलाई शासन परिवर्तनको अवसरको रूपमा लिइरहेका छन्।’ वाइनेट न्युजको रिपोर्ट अनुसार, फोराउटनले मिडिया लाइनसँगको अन्तर्वार्तामा उनले भने ‘इजरायली आक्रमणले देशको सैन्य, आर्थिक र आणविक पूर्वाधारलाई गम्भीर क्षति पुर्‍याएको छ र प्रमुख व्यक्तित्वहरू मारिएका छन्। तैपनि, इरानी जनता यस आक्रमणबाट सबैभन्दा खुसी छन्।’

उनले भने ‘अहिले नै उत्तम समय हो किनभने धेरैजसो इरानी जनताको लागि राजकुमार रेजा पहलवीको रूपमा एक नेता छन् जो विगत ४५ वर्षदेखि यो क्षणको लागि पर्खिरहेका छन्।’ इरानको अन्तिम राजाका छोरा पहलवी, १९७९ को इरानी क्रान्तिदेखि निर्वासनमा बस्दै आएका छन् । यस क्रान्तिका क्रममा उनका बुबालाई सत्ताबाट हटाइएको थियो। धेरै शासन विरोधी इरानीहरूले पहलवीलाई इस्लामिक गणतन्त्र इरानको अर्को नेताको रूपमा उत्तम विकल्पको रूपमा हेर्छन्।

उनले भने ‘सबैभन्दा राम्रो अवस्था भनेको इजरायली आक्रमणले द्रुत शासन परिवर्तन निम्त्याउनेछ र युवराज पहलवीले सत्ता सम्हाल्नेछन्। उनी अर्को राजा बन्नु आवश्यक छैन किनकि उनले धेरै पटक भनेका छन् – इरान स्वतन्त्र भएपछि उनको जिम्मेवारी समाप्त हुनेछ। त्यसपछि, इरानका जनताले स्वतन्त्र चुनाव मार्फत उनीहरू संसदीय राजतन्त्र चाहन्छन् वा गणतन्त्रात्मक प्रणाली भन्ने निर्णय गर्नेछन् ।’

फोराउटनले भने ‘ट्रम्पलाई नचिन्नेहरूले अब बुझेका छन्, उनी जे भन्छन् त्यही गर्छन्। उनलाई युद्ध मन पर्दैन। उनी इस्लामिक गणतन्त्रसँग युद्ध चाहँदैनथे । उनले उनीहरूलाई सबै मौका दिए। हिजोसम्म पनि उनी भन्दै थिए – वार्ताको टेबलमा आउनुहोस्। तर यस पटक अयातोल्लाहहरूले ठूलो गल्ती गरे र त्यो गल्तीको कारण आशा छ, धेरै चाँडै इरानका जनता ४५ वर्षको यो अधिनायकवादी शासन पछि स्वतन्त्र हुनेछन्, जसले मूल रूपमा उनीहरूलाई मारिरहेको छ, यातना दिइरहेको छ, जेलमा हालिरहेको छ र अन्य यस्तै कार्यहरू गरिरहेको छ।

फोराउटनले इरान विरुद्ध इजरायली अभियान कम्तिमा एक हप्तासम्म चल्ने दाबी गरे। उनले इरानले सैन्य रूपमा केही गर्न सक्दैन भन्ने सुनिश्चित गरेपछि अयातोल्लाह अली खामेनीले देश छोडेर भाग्ने विकल्प छनौट गर्ने दाबी गरे ।
फोराउटनले इरानका धेरै उच्चस्तरीय व्यक्तिहरू रूस भागेको दाबी गरे ।