वासिङ्टन डिसी। विश्वका २० भन्दा बढी देशका युवा नेताहरूको सहभागितामा सम्पन्न युवा कूटनीतिज्ञ फोरम (वाइडीएफ) मा नेपाली प्रतिनिधि बिबेक पौडेलले कृत्रिम बुद्धिमत्ता (एआइ) मा विकासशील राष्ट्रहरूको समान पहुँच र सांस्कृतिक सहकार्यका विषयमा आफ्ना विचार प्रस्तुत गरे।

फोरममा फ्लान्डर्सका प्रतिनिधि पाउल हेग, युरोपेली युनियनकी फानी लाफोर्केड र मोजाम्बिकका राजदूत अल्फ्रेडो नुभुङ्गासँग भएको बैठकमा नेपालमा एआइ प्रविधिको न्यायोचित पहुँच, सांस्कृतिक आदानप्रदान र युवा सीप विकासमा सहकार्यका अवसरहरूमा छलफल गरिएको थियो।

मेरिडियन इन्टरनेसनल केन्द्रका म्याक्स बुचेटसँगको वार्तामा काठमाडौं, चितवन, पोखरा र अन्य नगरपालिकाका मेयरहरूलाई अन्तर्राष्ट्रिय फोरममा समेटेर स्थानीय अनुभव साझा गर्ने योजना तयार पारिएको छ। एस्टोनियाकी डा. अन्ना-मारिया ओसुलाले नेपालमा डिजिटल प्रशासन र डिजिटल पहिचानसम्बन्धी सहयोगको सम्भावना रहेको जानकारी गराइन्।

अमेरिकी विदेश मन्त्रालय भ्रमणमा प्रतिनिधिले अमेरिकी विदेश नीति, व्यापार र बहुपक्षीय सहकार्यबारे छलफल गरे। विश्व बैंकको मुख्यालय भ्रमणका क्रममा संस्थाको संरचना, कार्यशैली र विकास परियोजनाहरूको विस्तृत अवलोकन गरियो। विश्व बैंकका उच्च अधिकारीहरूसँग विकासशील देशहरूका लागि प्रभावकारी कार्यक्रम निर्माण र कार्यान्वयनबारे विचारविमर्श गरिएको थियो।

भूराजनीतिक विशेषज्ञ जोन सिटिलिडेसले अमेरिकाको रणनीतिक अवस्थिति र सहयोगी कार्यक्रम एमसीसी को भूमिका विश्लेषण गरे। साथै, कालेव लीटारु र क्रिस्टोफर पेन्टरले विकासशील राष्ट्रहरूको डाटा समानताको लागि अन्तर्राष्ट्रिय पहलमा जोड दिए।

अमेरिकी राज्यहरूको संगठन (OAS) को मुख्यालय भ्रमणका क्रममा संस्थाको संरचना र विकास कार्यक्रमबारे जानकारी लिइएको थियो। प्रतिनिधिले यस फोरमले नेपाल लगायत विकासशील राष्ट्रहरूका लागि अवसरहरू सिर्जना गर्ने विश्वास व्यक्त गरे।