किएभ। किएभमा बिहीबार भएको रूसी आक्रमणमा कम्तीमा छ जनाको मृत्यु भएको अधिकारीहरूले बताएका छन्। मस्कोले भने देशको पूर्वमा युक्रेनी सेनाको प्रमुख गढ रहेको सहर कब्जा गरेको दाबी गरेको छ। ड्रोन र क्षेप्यास्त्र आक्रमणले बिहानको समयमा किएभका कम्तीमा २७ स्थानमा प्रहार गरेको सहरका अधिकारीहरूले बताएका छन्।

‘अहिलेसम्म छ जनाको मृत्यु भएको पुष्टि भएको छ’, सहरको सैन्य प्रशासनका प्रमुख तिमुर टाकाचेन्कोले टेलिग्राममा एक पोस्टमा भने, ‘५२ जना घाइते भएका छन्, लगभग ३० जना अस्पतालमा छन्। यसमा नौ जना बालबालिका पनि छन्।’

‘किएभमा यो एउटा डर लाग्दो बिहान हो। क्रूर रुसी आक्रमणहरूले सम्पूर्ण आवासीय भवनहरू ध्वस्त पारे र विद्यालय र अस्पतालहरूलाई क्षति पुर्‍याए। नागरिकहरू घाइते हुन्छन् र मारिन्छन्। अझै पनि भग्नावशेषमुनि मानिसहरू छन्’, युक्रेनी विदेशमन्त्री एन्ड्री सिबिगाले एक्समा लेखेका छन्।

युक्रेनमा रुसले गरेको पछिल्लो घातक आक्रमण अमेरिकी राष्ट्रपति डोनाल्ड ट्रम्पले मस्कोलाई युक्रेनमा आक्रमण रोक्न १० दिनको अल्टिमेटम जारी गरेको केही दिनपछि आएको हो। रुसले पूर्वमा युक्रेनी सेनाका लागि रणनीतिक रूपमा महत्त्वपूर्ण सैन्य केन्द्र रहेको चासिभ यार सहर कब्जा गरेको बताएको छ। बिहीबारको आक्रमण मंगलबार सैन्य प्रशिक्षण शिविरमा रुसी हमलालगत्तै भएको थियो।

उक्त हमलामा कम्तीमा तीन युक्रेनी सैनिकको मृत्यु भएको थियो। बिहीबारको आक्रमणपछि युक्रेनका विदेशमन्त्रीले अन्तर्राष्ट्रिय समुदायलाई सन् २०२२ फेब्रुअरीमा सुरु भएको युद्ध अन्त्य गर्न मस्कोमाथि अत्यधिक दबाब दिन आह्वान गरे।