काठमाडौं । पाकिस्तानले जेलमा रहेका पूर्व प्रधानमन्त्री इमरान खानको पार्टीका १०८ सदस्यलाई जेल सजाय सुनाएको छ। सजाय सुनाइएकाहरूलाई सन् २०२३ मा सेना विरुद्धको विरोध प्रदर्शनमा भाग लिएको आरोप लगाइएको छ।

मे २०२३ मा, सुरक्षा बलले भ्रष्टाचारको आरोपमा अदालतमा उपस्थित हुने क्रममा इमरान खानलाई पक्राउ गर्‍यो, जसले गर्दा देशभर हिंसात्मक विरोध प्रदर्शनहरू भए।

बिहीबार आएको यो निर्णयलाई इमरान खानको पार्टी पाकिस्तान तहरीक-ए-इन्साफ (पीटीआई) को लागि ठूलो झट्का मानिएको छ।

सजाय सुनाइएकाहरूमा पाकिस्तानको राष्ट्रिय सभाका विपक्षी नेता उमर अयुब खान पनि छन् जसलाई १० वर्षको जेल सजाय सुनाइएको थियो।

आतंकवाद विरोधी अदालतको निर्णयको विपक्षी नेताहरूले निन्दा गरेका छन्। यस निर्णयमा पीटीआईका छ जना सांसदलाई पनि अयोग्य घोषित गरिएको छ।