मुगु। बाढीपहिराका कारण गमगढी–बालै–पिना सडकखण्ड पूर्ण रूपमा अवरुद्ध भएको छ। लगातारको झरीपछि पहिरो खसेर करिब दुई महिनादेखि सडक अवरुद्ध भएको हो।

सडकका विभिन्न भागमा माटो, ढुङ्गा थुप्रिएको छभने केही स्थानमा सडक भासिएकाले हिँड्न पनि कठिन भएको छ। बाटो बन्द हुँदा स्थानीय वैकल्पिक लामो बाटो प्रयोग गर्न बाध्य भएका छन्। खाद्यान्न र औषधि ढुवानीमा समस्या भएको छ।

स्थानीयवासी दानबहदुर शाहीका अनुसार जताततै पहिरो खसेको छ। दलदल माटो बगेको छ, मान्छे हिँड्न पनि समस्या छ। अवरुद्ध सडक खुलाउनतर्फ कसैको ध्यान गएको छैन।

यसैबीच, गमगढी नगरपालिकाका कार्यवाहक प्रमुख ऐश्वर्या वर्षा रोकिनासाथ पहिरो पन्छाइने बताउँछिन्। उनले डोजरलगायत उपकरण तयारी अवस्थामा रहेका जानकारी दिइन्।