काठमाडौं। संयुक्त राष्ट्रसंघको अन्तर्राष्ट्रिय युवा दिवस २०२५ को अवसरमा, यूनिभर्सल पीस फेडरेशन–नेपाल (युपीएफ नेपाल) ले “Local Youth Actions for the SDGs and Beyond” भन्ने विषयमा काठमाडौंको नक्सालस्थित पीस एम्बेसी भवनमा भव्य कार्यक्रम सम्पन्न गर्‍याे।

कार्यक्रममा प्रमुख व्यक्तित्व, युवा प्रतिनिधि, कलाकार तथा शान्ति अभियन्ताहरूको उल्लेखनीय सहभागिता रह्यो। वक्ताहरूले दिगो विकास लक्ष्य (SDGs) हासिल गर्न युवाको नेतृत्व र सक्रियताको महत्वमा प्रकाश पारे।

कार्यक्रममा करिब १५० जना युवा सहभागी, कलेजका प्रिन्सिपल, नागरिक समाजका अगुवा तथा विभिन्न क्षेत्रका प्रतिष्ठित व्यक्तिहरू उपस्थित थिए। कार्यक्रम राष्ट्रिय गानबाट सुरु भई संविधानसभा सदस्य मिलन रजबंशीको स्वागत मन्तव्यपछि भिडियो प्रस्तुति र अन्तर्राष्ट्रिय प्रतिनिधि रिचेल जालिपाको विशेष सम्बोधन प्रस्तुत भयो।

प्रमुख वक्ता काठमाडौं महानगरपालिकाकी उप-प्रमुख सुनीता डंगोल र सांसदशिशिर खनालले युवाद्वारा सञ्चालित शान्ति, विकास र दिगोपनाका पहलहरूको आवश्यकता र प्रभावबारे सम्बोधन गरे।

दोस्रो चरणमा सांसद तथा पूर्व शान्ति तथा पुनर्निर्माण मन्त्री माननीय एकनाथ ढकालबाट “Ambassador for Peace Award” प्रदान गरियो। कला, संस्कृति, स्वास्थ्य, खेलकुद र सामुदायिक नेतृत्वमा उत्कृष्ट योगदान पुर्‍याउने संगीतकार तथा निर्देशक दीपक शर्मा, गीतकार बसन्त बित्यासी थापा,गायिका निशा देशार,सह-प्राध्यापक तथा हड्डी-मेरुदण्ड विशेषज्ञ डा. सुभाष चन्द्र झा,नृत्याङ्गना/मोडेल/अभिनेत्री तथा टिभी प्रस्तोता कविता नेपाली,चिकित्सक तथा स्वास्थ्य व्यवस्थापन विशेषज्ञ डा. राम थापा क्षेत्री,संगीतकार/गायक/एरेन्जर संजय खड्गी (सञ्जित),अभिनेता तथा मोडेल सुरज गराच ‘स्राज’,अन्तर्राष्ट्रिय नेपाली कलाकार समाजका ग्लोबल ट्रेजरर कुलराज थापा,व्यवसायी कृष्णराज पोखरेल, इन्जिनियर प्रसिद्ध खरेल,फिटनेस ट्रेनर तथा बडीबिल्डर रजनी श्रेष्ठलाइ सम्मान गरियाे।

सम्मानपछि वरिष्ठ गायक तथा ‘मेलोडी किङ’ अनन्दा कार्कीले बधाई मन्तव्य दिए भने गायिका निशा देशारले विशेष संगीत प्रस्तुति दिइन्। कार्यक्रमको सञ्चालन प्रकाश थापाले गरेका थिए।

अन्त्यमा, यूपीएफ-नेपालका अध्यक्ष तथा एशिया प्यासिफिकका उपाध्यक्ष सन्तोष कुमार पौडेलले धन्यवाद ज्ञापन गरे। आयोजकहरूका अनुसार, यस कार्यक्रमले युवालाई शान्ति, विकास र सकारात्मक परिवर्तनका लागि प्रेरित गरेको छ।