काठमाडौं । पाकिस्तान प्रशासित कश्मीरमा बिहीबार बादल फुटेर आएको बाढीका कारण कम्तीमा आठ जनाको मृत्यु भएको छ भने सयौं पर्यटक अलपत्र परेका छन्।

बीबीसी उर्दूका अनुसार वर्षा र बादल फुट्दा एकै परिवारका छ जनाको मृत्यु भएको छ। उद्धारकर्मीहरूले श्रीमान, श्रीमती र तीन बच्चाहरूको शव निकालेका छन्। बालिकाको खोजी अझै जारी छ।

भारी वर्षाका कारण मुजफ्फराबाद, नीलम बाग, नीलम उपत्यका र झेलम उपत्यका जिल्लाका सबै विद्यालयहरूमा बिदा घोषणा गरिएको छ। प्रभावित परिवारहरूलाई विद्यालय भवनहरूमा स्थानान्तरण गर्न आदेश जारी गरिएको छ।

पहिरोका कारण कश्मीरलाई इस्लामाबादसँग जोड्ने कोहला र एबटाबाद पासहरू बन्द गरिएका छन्। नीलम बाग जिल्ला पनि स्थल मार्गबाट काटिएको छ।

पर्यटकीय स्थल नीलम उपत्यकाको शिविरमा महिला र बालबालिकासहित पाँच सयभन्दा बढी पर्यटक अलपत्र परेका छन्।

पाकिस्तानको खैबर पख्तुनख्वा प्रान्तको तल्लो दिरमा वर्षा र आकस्मिक बाढीका कारण पाँच जनाको मृत्यु भएको छ भने चार जना घाइते भएका छन्।

बाजौर जिल्लाको सलारजाई तहसीलमा बादल फुटेर चट्याङ पर्दा १६ जनाको मृत्यु भएको छ भने तीन जना घाइते भएका छन्।

बाजौरका उपायुक्त शाहिद अलीले सञ्चारमाध्यमलाई बताएअनुसार अहिलेसम्म १६ जनाको शव निकालिएको छ भने ३ जना घाइतेलाई उपचारको लागि खार जिल्ला मुख्यालय अस्पताल पठाइएको छ।

खैबर पख्तुनख्वाको मानसेहरा क्षेत्रमा अचानक आएको बाढीमा एउटा कार बगाएको छ। यसमा दुई जनाको मृत्यु भएको छ।