काठमाडौं । दक्षिणी गाजा पट्टीको एक अस्पतालमा इजरायली आक्रमणमा पाँच पत्रकारसहित कम्तीमा २० जनाको मृत्यु भएको छ।

अस्पतालमा भएको पहिलो आक्रमणमा रोयटर्सका लागि काम गर्ने क्यामेराम्यान हुसम अल-मसरी मारिएको समाचार एजेन्सीले पुष्टि गरेको छ।

मरियम डग्गा एक स्वतन्त्र पत्रकार थिइन् र एसोसिएटेड प्रेस (एपी) मा काम गर्थिन्। मोहम्मद सलामा अल जजीरा र मिडल इस्ट आईसँग सम्बन्धित थिए।

अहमद अबु अजीज मिडल इस्ट आइमा फ्रीलान्सरको रूपमा काम गर्थे र खान युनिसमा बस्थे।

मुअथ अबु ताहा कुन संस्थासँग सम्बन्धित थिए भन्ने कुरा अहिलेसम्म पुष्टि भएको छैन। अमेरिकी टिभी नेटवर्क एनबीसीले ताहाले उनीहरूसँग काम नगरेको बताएको छ भने प्रारम्भिक रिपोर्टहरूमा उनको नाम एनबीसीसँग जोडिएको थियो।

विदेशी प्रेस संघले इजरायली सेना र प्रधानमन्त्री कार्यालयबाट घटनाको बारेमा “तत्काल स्पष्टीकरण” माग गरेको छ।

“गाजा युद्ध सुरु भएदेखि नै अन्तर्राष्ट्रिय मिडियामा काम गर्ने पत्रकारहरूमाथि यो सबैभन्दा घातक इजरायली आक्रमणहरू मध्ये एक हो,” संघले आफ्नो विज्ञप्तिमा भनेको छ।

इजरायल रक्षा बल (आइडीएफ) ले आक्रमणको जवाफ दिँदै “पत्रकारहरूलाई लक्षित नगर्ने” बताएको छ।