काठमाडौं । पाकिस्तानका केही मानिसहरूले जापान यात्रा गर्नको लागि एउटा पूरै नक्कली फुटबल टोली समेत बनाएका छन् । उनीहरूले राष्ट्रिय टोलीको रूपमा भिसा पनि लिए र जापान पुगे। त्यहाँका अधिकारीहरूलाई शंका लागेपछि सम्पूर्ण मामिलाको पर्दाफास भयो।

पाकिस्तानी मिडिया रिपोर्टका अनुसार पाकिस्तानको संघीय अनुसन्धान एजेन्सी (एफआईए) ले पेशेवर फुटबल खेलाडीको रूपमा प्रस्तुत भएर जापानमा अवैध रूपमा प्रवेश गर्ने प्रयास गर्ने मानिसहरू संलग्न रहेको मानव तस्करी गिरोहको पर्दाफास गरेको छ। २२ जना संदिग्धहरूलाई पक्राउ गरिएको छ । ती सबै खेलाडी भएको नाटक गरिरहेका थिए।

सबै पाकिस्तानीहरूलाई जापानमा पक्राउ गरियो र उनीहरूको देश फिर्ता पठाइयो। एफआइए अधिकारीहरूका अनुसार समूहले पूर्ण फुटबल पोशाक लगाएर यात्रा गर्‍यो र पाकिस्तान फुटबल महासंघ (पीएफएफ) सँग सम्बद्ध भएको दाबी गर्‍यो। उनीहरूसँग पाकिस्तानको विदेश मन्त्रालयले जारी गरेको नक्कली नो अब्जेक्सन सर्टिफिकेट (एनओसी) थियो।

सोधपुछको क्रममा, जापानी अध्यागमन अधिकारीहरूलाई शंका लाग्यो र उनीहरूले ठगीको पर्दाफास गरे। जियो न्यूजको रिपोर्ट अनुसार ती पुरुषहरूलाई पाकिस्तान फिर्ता पठाइएको थियो । यद्यपि अधिकारीहरूले उनीहरू कसरी अध्यागमन अघिकारीहरूलाई झुक्याएर पाकिस्तानी विमानस्थलबाट विमान चढ्न सफल भए भन्ने कुरा स्पष्ट पारेका छैनन्।

सियालकोटको पसरुरका बासिन्दा मलिक वकासले यो गिरोह सञ्चालन गरिरहेको अधिकारीहरूले बताएका छन्। उनले गोल्डेन फुटबल ट्रायल नामक नक्कली फुटबल क्लब सुरु गरेको र यात्राको लागि प्रत्येक इच्छुक व्यक्तिबाट ४० लाख देखि ४५ लाख रुपैयाँसम्म लिएको आरोप छ।

गुजरानवालास्थित एफआईएको कम्पोजिट सर्कलले सेप्टेम्बर १५ मा वकासलाई पक्राउ गरेको थियो। पाकिस्तानी मिडियाका अनुसार उनी विरुद्ध धेरै मुद्दा दर्ता भएका छन्।

यो वकासको जापानमा मानिसहरू पठाउने पहिलो प्रयास होइन । अधिकारीहरूले जनवरी २०२४ मा, उनले १७ जनालाई त्यही बाटोबाट जापान यात्रा गर्ने व्यवस्था मिलाएको र जापानी क्लब, बोभिस्टा एफसीबाट नक्कली निमन्त्रणा प्रयोग गरेर १५-दिनको भिसा प्राप्त गरेको खुलासा गरे। तिनीहरूमध्ये कोही पनि कहिल्यै फर्किएनन्।