काठमाडौ । इजरायली सेनाले दक्षिणी गाजाको रफाहमा हवाई आक्रमणको पुष्टि गरेको छ र हमासले युद्धविराम उल्लङ्घन गरेको आरोप लगाएको छ।

सेनाका प्रवक्ताले भने – हमासले “यलो लाइन” पार गर्दै इजरायली सेनामाथि धेरै आक्रमणहरू गरेको छ, जुन क्षेत्रबाट अमेरिकाको मध्यस्थतामा भएको सम्झौताको पहिलो चरण अन्तर्गत इजरायली सेना फिर्ता भएको थियो।

इजरायली प्रधानमन्त्री बेन्जामिन नेतान्याहूले आफ्ना सुरक्षा अधिकारीहरूलाई ‘गाजा पट्टीमा रहेका आतंकवादी लुक्ने ठाउँहरू विरुद्ध कडा कारबाही गर्न’ निर्देशन दिएका छन्।

यसैबीच, हमासले युद्धविराम पालना गरिरहेको बताएको छ र इजरायलले धेरै पटक युद्धविराम उल्लंघन गरेको आरोप लगाएको छ।

एक इजरायली सुरक्षा अधिकारीले गाजामा मानवीय सहायता अर्को सूचना नभएसम्मका लागि रोकिएको बताएका छन्।

सुरक्षा अधिकारीका अनुसार, “राजनीतिक नेतृत्वको निर्देशन अनुसार, गाजा पट्टीमा मानवीय सहायताको आपूर्ति रोकिएको छ किनभने हमासले खुला रूपमा सम्झौताको उल्लंघन गरेको छ।”

स्थानीय स्रोतहरूका अनुसार मध्य गाजाको अल-जवैदा शहरमा इजरायली हवाई आक्रमणमा हमासको अल-कासिम ब्रिगेडका छ सदस्य मारिएका छन्। जसमा जबलिया बटालियनको विशेष एकाइका कमाण्डर याह्या अल-मबोह पनि समावेश छन्।

आक्रमण शहरको समुद्र तटमा रहेको सानो पाल भएको क्याफेमा भएको थियो। अल-जवैदा गाजाको तटमा देइर अल-बलाह र खान युनिसको बीचमा अवस्थित छ।

मारिएका छ जना लडाकुहरू मूल रूपमा उत्तरी गाजाका थिए, तर आक्रमणको समयमा उनीहरू यहाँ तैनाथ थिए।

युद्धविराम सुरु भएदेखि नै अल-मबोहको मृत्युलाई हमासको विशेष सेनाको लागि सबैभन्दा ठूलो क्षति मानिएको छ।

इजरायली रक्षा बल (आईडीएफ) ले एक विज्ञप्तिमा गाजा पट्टीको दक्षिणी भागमा निरन्तर आक्रमण सुरु गरेको बताएको छ।

धेरै गाजावासीहरूले इजरायली हवाई आक्रमण यति चाँडै पुनः सुरु हुने अपेक्षा नगरेको बताएका छन्। युद्धविरामपछि महसुस भएको थोरै राहत अब डर र अनिश्चिततामा परिणत भएको छ।

मानिसहरू आफ्नो पाल र घर फर्किरहेका छन्, र धेरै क्षेत्रहरूमा अत्यावश्यक वस्तुहरूको मूल्य बढ्न थालेको छ, जसले स्थितिको बारेमा चिन्ता र निराशाको भावना बढिरहेको स्पष्ट रूपमा संकेत गर्दछ।

हमासले रफाहको घटनाबाट आफूलाई टाढा राखेको छ र इजरायली समर्थित मिलिशियामाथि आक्रमण गर्ने लडाकुहरू धेरै पहिले नै हमासबाट अलग भइसकेको बताएको छ।

हमासले शर्म अल-शेखमा भएको युद्धविराम सम्झौताप्रति प्रतिबद्ध रहेको दाबी गरेको छ, तर स्थलगत अवस्थाले स्थिति द्रुत गतिमा बिग्रँदै गएको र कुनै पनि समयमा युद्धविराम भङ्ग हुन सक्ने संकेत गर्छ।

हमास नियन्त्रित स्वास्थ्य मन्त्रालयले विगत २४ घण्टामा इजरायली आक्रमणमा गाजामा कम्तीमा आठ जनाको मृत्यु भएको जनाएको छ।

मन्त्रालयका अनुसार यी आक्रमणहरूमा तीन जना घाइते भएका छन् र १० जनाको शव निकालिएको छ।

तर धेरै मानिसहरू अझै पनि ‘भग्नावशेषमुनि र सडकमा फसेका’ छन् किनभने एम्बुलेन्स र राहत टोलीहरू उनीहरूसम्म पुग्न असमर्थ छन्।

ट्रम्पको प्रस्तावित युद्धविराम लागू भएदेखि ३५ जनाको मृत्यु भएको, १४६ जना घाइते भएको र ४१४ जनाको शव निकालिएको स्वास्थ्य मन्त्रालयले जनाएको छ।

७ अक्टोबर २०२३ मा भएको आक्रमणको प्रतिक्रियामा इजरायली सैन्य कारबाही सुरु भएदेखि गाजामा कुल मृत्यु हुनेको संख्या ६८,१५९ पुगेको छ। उक्त आक्रमणमा हमासले लगभग १,२०० जनाको हत्या गरेको थियो र २५१ जनालाई बन्धक बनाएको थियो।