काठमाडौं । अल्बानियाकी एआई मन्त्री डिएला गर्भवती छिन्। डिएला आर्टिफिसियल इन्टेलिजेन्समा आधारित विश्वकै पहिलो मन्त्री हुन्। यस पटक उनी गर्भवती छिन् र ८३ बच्चा जन्माउन लागेकी छिन्। उनले आफू रोबोटबाट गर्भवती भएको घोषणा गरेकी छिन्।

यो घोषणा अल्बानियाका प्रधानमन्त्री एडी रामा आफैंले गरेका थिए। जर्मनीको बर्लिनमा आयोजित ग्लोबल डायलग सम्मेलनको क्रममा अल्बानियाका प्रधानमन्त्री एडी रामाले यो घोषणा गरेर सबैलाई चकित पारेका थिए। यद्यपि, एआई मन्त्रीको गर्भावस्थाको फरक अर्थ छ।

डिएला, जसको अर्थ अल्बानियाली भाषामा सूर्य हो, अल्बानियाको “कृत्रिम बुद्धिमत्ता राज्यमन्त्री” हुन्, जुन पद पूर्णतया एआईमा आधारित छ। उनी विश्वको पहिलो एआई-उत्पन्न सरकारी मन्त्री हुन्।

उनलाई परम्परागत अल्बानियाली पोशाकमा महिलाको रूपमा चित्रण गरिएको छ। यसको अर्थ उनी एआई-आधारित रोबोट हुन्, जसलाई अल्बानियाली सरकारले नियुक्त गरेको छ।

“आज हामीले डिएलासँग ठूलो जोखिम उठायौं र हामीले धेरै राम्रो गर्यौं। त्यसैले पहिलो पटक डिएला गर्भवती छिन् र उनका ८३ बच्चाहरू हुँदैछन्,” प्रधानमन्त्री एडी रामाले बर्लिनमा भएको ग्लोबल डायलगमा भने।

प्रधानमन्त्री एडी रामाले “८३ बच्चा” भनेका कुराहरू वास्तवमा ८३ वटा नयाँ एआई सहायकहरू हुन्। यी एआई सहायकहरू सत्तारुढ समाजवादी पार्टीका प्रत्येक संसद सदस्य (एमपी) को लागि एकका दरले सिर्जना गरिनेछन्।

प्रधानमन्त्री एडी रामाले भने ‘यी एआई सहायकहरू वा “बच्चाहरू” ले संसदमा हुने सबै कुरा रेकर्ड गर्नेछन् र प्रतिनिधिहरूलाई उनीहरूले छुटाएका छलफल वा घटनाहरूको बारेमा जानकारी गराउनेछन्।

यी एआई सहायकहरूले संसदीय सत्रहरूमा भाग लिनेछन्, सबै छलफल र कार्यक्रमहरू रेकर्ड गर्नेछन् र आफ्ना मालिकहरूलाई कुन मुद्दाहरूमा प्रतिआक्रमण गर्ने भनेर सल्लाह दिनेछन्। यी सहायकहरू २०२६ को अन्त्यसम्ममा पूर्ण रूपमा सञ्चालनमा आउनेछन् र डिएलाको “ज्ञान” (डेटा र एल्गोरिदम) उनीहरूलाई हस्तान्तरण गरिनेछ।

पीएम रामाले यी एआई सहायकहरूले कसरी काम गर्नेछन् भनेर पनि व्याख्या गरे। उनले भने, “यदि तपाईं कफी पिउन बाहिर जानुभयो र काममा फर्कन बिर्सनुभयो भने यो सहायकले तपाईं हलमा नभएको बेला भनिएको कुरा दोहोर्याउनेछ र तपाईंले कसलाई जवाफ दिनुपर्छ भनेर पनि बताउनेछ।”

डिएलालाई अल्बानियाको सार्वजनिक खरिद प्रणालीलाई पूर्ण रूपमा पारदर्शी र भ्रष्टाचारमुक्त बनाउन सेप्टेम्बरमा नियुक्त गरिएको थियो। उनी नागरिक र व्यवसायहरूलाई सरकारी कागजातहरू प्राप्त गर्न मद्दत गर्दैछिन्। एआई-निर्मित मन्त्रीलाई परम्परागत अल्बानियाली पोशाकमा महिलाको रूपमा चित्रण गरिएको छ।

डिएलालाई सार्वजनिक टेन्डरसँग सम्बन्धित सबै निर्णयहरू गर्ने जिम्मेवारी दिइएको छ । उनले ती निर्णयहरू १०० प्रतिशत भ्रष्टाचारमुक्त छन् भनी सुनिश्चित गर्छिन्। प्रधानमन्त्री रामाले टेन्डर प्रक्रियामा जम्मा गरिएको प्रत्येक सार्वजनिक कोष पूर्ण रूपमा पारदर्शी हुने बताए।