काठमाडौं। आइसिसी विश्वकप क्रिकेट लिग-२ अन्तर्गत घरेलु टोली संयुक्त अरब इमिरेट्स (युएई) विरुद्ध एकदिवसीय शृङ्खालको अन्तिम खेलमा नेपालले पहिला ब्याटिङ गर्ने भएको छ।

दुबईस्थित आइसिसी एकेडेमीमा भर्खरै भएको टसमा युएईका कप्तान आलिशान शराफुले टस जितेर पहिला फिल्डिङ रोजेका छन्। यसँसगै नेपालले पहिला ब्याटिङको निम्तो पाएको हो । यस शृङ्खलामा यसअघि नेपालले खेलेको तीन खेलमा तीनैमा पराजित भएको छ।

पहिलो खेलमा नेपाल अमेरिकासँग १०६ रनले पराजित भएको थियो भने दोस्रो खेलमा युएईसँग पाँच विकेटले पराजित भएको थियो। त्यसैगरी तेस्रो खेलमा नेपाल अमेरिकासँग चार विकेटले पराजित भएको थियो।

समग्रमा भने १९ खेल खेलको नेपाल १२ हार र पाँच जितकासाथ १२ अंक जोडेर अंक तालिकाको सातौं स्थानमा छ। दुई खेल भने विना नतिजा टुंगिएको थियो। यता युएई १९ खेलबाट १५ हार र चार जितको साथ आठ अंक जोडेर अङक तालिकाको अन्तिम स्थानमा छ। आज नेपाल अघिल्लो खेलको हारको बदला लिँदै जित निकाल्ने उद्देश्यका साथ मैदानमा उत्रँदैछ।