झापा। शिवसताक्षीस्थित दूधे रंगशालामा जारी एलभिडी झापा महिला गोल्डकप फुटबल प्रतियोगिताअन्तर्गत आज भएको तेस्रो क्वार्टर फाइनलमा संकटा फुटबल क्लब काठमाडौंले घरेलु टोली झापा एफसीलाई ६–० गोल अन्तरले पराजित गरेको छ।

यो जीतसँगै संकटा फुटबल क्लब सेमिफाइनलमा प्रवेश गरेको छ। खेलको सुरुआतदेखि संकटा टोली आक्रामक देखिएको थियो। २३औँ मिनेटमा सेनु परियारले संकटाका लागि पहिलो गोल गरेकी थिइन्। पहिलो हाफको इन्ज्युरी समयमा समीक्षा मगरले अर्को गोल गर्दै संकटाको अग्रता बढाएकी थिइन्।

यसैगरी, ५५औँ मिनेटमा भुटानबाट अनुबन्धित छिरिङ वाङ्देनले तेस्रो गोल र ६१औँ मिनेटमा पूर्णिमा राईले अर्को गोल गर्दै झापा एफसीसँगको गोलअन्तर ४–० बनाएकी थिइन्। ८३औँ मिनेटमा रेनिसा शर्माले पाँचौँ गोल थपिन् भने अरुणा स्याङ्तेनले खेलको अन्तिम समयतिर अर्को गोल थपेर संकटाको जीत ६–० मा पक्का गरिन्।

खेलमा उत्कृष्ट प्रदर्शन गरेकी पूर्णिमा राई प्लेयर अफ द म्याच भइन्। उनले नगद रु १५ हजार र ट्रफी प्राप्त गरिन्। झापा एफसीका प्रशिक्षक सन्देश श्रेष्ठले तयारी अभावका कारण टोलीले अपेक्षित प्रदर्शन गर्न नसकेको प्रतिक्रिया दिए। संकटा क्लबका प्रशिक्षक रविन्द्र शिलाकारले रणनीतिअनुसार नै खेलमा जित निकालेको बताए।

प्रतियोगिताको फाइनल खेल कात्तिक २४ गते हुनेछ। विजेता टोलीले नगद रु १० लाख १० हजार, उपविजेताले रु पाँच लाख र सर्वोत्कृष्ट खेलाडीले रु एक लाख ५० हजार पाउनेछन्।

उत्कृष्ट गोलकिपर, डिफेन्डर, मिडफिल्डर, फरवार्ड, उदीयमान खेलाडी, उत्कृष्ट प्रशिक्षक र उच्च गोलकर्ताले जनही रु २५ हजारका दरले पुरस्कार पाउनेछन्। भोलि बिहीबार हुने अन्तिम क्वाटर फाइनल खेलमा आरएस पोखरा र विभागीय टोली त्रिभुवन आर्मी क्लबबीच प्रतिष्पर्धा हुने भएको छ।