काठमाडौं । टेस्ट र टी-२० क्रिकेटबाट सन्यास लिएका विराट कोहली र रोहित शर्माका लागि अब राष्ट्रिय टिममा स्थान बनाउने बाटो घरेलु क्रिकेटबाट हुनेछ । भारतीय क्रिकेट नियन्त्रण बोर्ड (बीसीसीआई) ले दुवै वरिष्ठ खेलाडीहरूलाई स्पष्ट सन्देश दिएको छ – यदि उनीहरू एकदिवसीय टोलीमा रहन चाहन्छन् भने घरेलु क्रिकेट खेल्नु अनिवार्य हुनेछ।

स्रोतका अनुसार बोर्ड र टोली व्यवस्थापनले दुवैलाई अन्तर्राष्ट्रिय तालिकामा कुनै खाली समय भेटिएमा विजय हजारे ट्रफी वा अन्य घरेलु प्रतियोगिताहरूमा भाग लिन निर्देशन दिएको छ। यसको उद्देश्य सिनियर खेलाडीहरूको खेल फिटनेस र लय कायम राख्नु र लामो विश्राम पछि सिधै अन्तर्राष्ट्रिय खेलहरूमा जानबाट बच्नु हो।

रोहित शर्माले मुम्बई क्रिकेट संघ (एमसीए) लाई आफू विजय हजारे ट्रफी खेल्न उपलब्ध हुने जानकारी गराएका छन्। भारतीय क्रिकेट नियन्त्रण बोर्ड (बीसीसीआई) ले राष्ट्रिय टोली छनोटको लागि प्रतिस्पर्धामा रहन वरिष्ठ खेलाडीहरूले घरेलु क्रिकेटमा भाग लिनुपर्ने कडा निर्देशन जारी गरेपछि यो निर्णय आएको हो ।

इन्डियन एक्सप्रेसको एक रिपोर्ट अनुसार, रोहितले डिसेम्बर २४ देखि सुरु हुने मुम्बई टोलीको अभियानमा आफ्नो सहभागिता पुष्टि गरेका छन्। यो मिति घरेलु क्यालेन्डरमा एक मात्र ओडिआइ विन्डो हो, जुन दक्षिण अफ्रिका र न्यूजील्याण्ड विरुद्धको भारतको घरेलु ओडीआइ शृंखलाको बीचमा पर्छ।

अष्ट्रेलिया विरुद्धको हालैको एकदिवसीय शृंखलामा दुवै खेलाडीले उत्कृष्ट प्रदर्शन गरे। तेस्रो खेलमा रोहित शर्माले शतक बनाए भने दुई पटक सुरुवाती शून्यमा आउट भएपछि विराट कोहलीले अविजित ८७ रन बनाए। यसका बाबजुद पनि, बोर्ड यी अनुभवी खेलाडीहरूले आफ्नो लय गुमाएको चाहँदैन।

छनोट समितिका अध्यक्ष अजित आगरकरले पहिले नै भनेका छन्, “यदि खेलाडीहरू खाली छन् भने, उनीहरूले घरेलु क्रिकेट खेल्नुपर्छ। यसले उनीहरूलाई तीक्ष्ण र तयार राख्छ।”

रोहित हाल मुम्बईको शरद पवार इन्डोर एकेडेमीमा प्रशिक्षण गरिरहेका छन् र उनले सय्यद मुश्ताक अली टी-२० प्रतियोगिताको लागि उपलब्ध हुने संकेत दिएका छन्। कोहली हाल लन्डनमा छन्, तर बोर्डले उनी पनि भारत फर्केर घरमै खेल्ने आशा राखेको छ।

गत सिजनमा, दुवैले रणजी ट्रफी खेल खेले । कोहली १२ वर्षपछि दिल्लीका लागि र रोहित १० वर्षपछि मुम्बईका लागि खेलेका थिए । त्यतिबेला रोहितले भनेका थिए ‘निरन्तर अन्तर्राष्ट्रिय तालिकाले घरेलु क्रिकेटको लागि समय निकाल्न गाह्रो बनाएको थियो, तर अब परिस्थिति परिवर्तन भएको छ।’

यद्यपि, आगरकरले यो पनि स्पष्ट पारे कि २०२७ मा हुने अर्को एकदिवसीय विश्वकपको लागि कोहली र रोहित दुवै ट्रायलमा छैनन्। उनका शब्दहरूमा, “दुबैले भारतीय क्रिकेटलाई धेरै दिएका छन्। अब टोलीको दिशा उनीहरूको अनुभव, फिटनेस र उपलब्धताले निर्धारण गर्नेछ।”