काठमाडौं । छत्तीसगढको माओवादी प्रभावित बिजापुरको दन्तेवाडाको सिमानामा भएको मुठभेडमा प्रहरीले १२ माओवादी मारेको दाबी गरेको छ।

प्रहरीका अनुसार, भिडन्तमा तीन जिल्ला रिजर्भ गार्ड सैनिक मारिएका छन्। अरु धेरै घाइते पनि भएका छन्। भिडन्त अझै जारी छ।

बिजापुरका प्रहरी अधीक्षक डा. जितेन्द्र यादवले भने, “विजापुर-दन्तेवाडा अन्तरजिल्ला सीमा क्षेत्रको पश्चिम बस्तर डिभिजन क्षेत्रमा डीआरजी दन्तेवाडा-बिजापुर, विशेष कार्य बल र कोब्रा, सीआरपीएफको संयुक्त टोलीद्वारा खोजी अभियान सञ्चालन भइरहेको छ।”

“अपरेशनको क्रममा आज बिहान ९ बजेदेखि प्रहरी र माओवादीबीच बेलाबेलामा गोलीबारी भइरहेको छ। सुरक्षाबलको अपरेशन उक्त क्षेत्रमा जारी छ।”

बस्तर रेन्जका प्रहरी महानिरीक्षक सुन्दरराज पट्टलिंगमले मुठभेडको पुष्टि गर्दै भने, “अहिलेसम्म मुठभेड स्थलबाट १२ माओवादीको शव बरामद गरिएको छ। घटनास्थलबाट एसएलआर र .३०३ राइफल सहित अन्य हतियार र गोला बारुद पनि जफत गरिएको छ।”

“मृतकहरूको पहिचान हुन बाँकी छ। भिडन्तमा विजापुर जिल्ला रिजर्भ गार्डका तीन जवान – हेड कन्स्टेबल मोनु वडादी र कन्स्टेबल डुकारु गोन्डे र रमेश सोडी – शहीद भए।”

सुन्दरराज पट्टलिंगमले अपरेशन अझै जारी रहेकाले अहिले नै विस्तृत जानकारी दिन सम्भव नभएको बताए।

प्रहरी उपरीक्षक डा जितेन्द्र यादवले उक्त क्षेत्रमा खोजी कार्य जारी रहेको र क्षेत्रलाई घेराबन्दी गरी खोजी कार्य पूरा गर्न थप बल खटाइएको बताए।