काठमाडौं। नेकपा एमालेको ११ औं महाधिवेशन आउन एक हप्तामात्रै बाँकी छ। एमालेको ११ औं महाविधेशन यही मंसिर २७ गतेदेखि सुरु हुँदैछ।

महाधिवेशनको मिति नजिकिएसँगै अध्यक्षमा उम्मेदवारी दिने घोषणा गरेका वर्तमान अध्यक्ष केपी शर्मा ओली र वरिष्ठ उपाध्यक्ष ईश्वर पोखरेल आफ्नो टिम बनाउन व्यस्त छन्। उनीहरुलाई आफ्नो प्यानल बनाउन सकस परिरहेको छ।

पदाधिकारीका आकांक्षी धेरै हुँदै दुवै समूहलाई टीम बनाउन सकस परिरहेको छ। अध्यक्ष ओलीले आफ्ना प्यानल बनाउन थालिसकेका छन्। उनले आफूले टीम बनाउने र उनीहरुलाई नै मत दिनुपर्ने कार्यकर्तालाई निर्देशन दिइसकेका छन्। ‘सकेसम्म सबैलाई मिलाएर लैजाने गरी टीम बन्छ,’ ओली निकट एक नेताले भने, ‘उम्मेदवारी दर्ता गर्ने बेलासम्म सबैलाई चित्त बझ्दो टीम बन्छ।’

ओलीले उपाध्यक्षमा विष्णु पौडेल, रामबहादुर थापा, गुरु बराललाई समेट्ने तयारी गरेका छन्। महासचिव कसलाई बनाउने भन्ने विषयमा ओलीले निर्णय लिन सकिरहेका छैनन्। वर्तमान महासचिव शंकर पोखरेल पुनः महासचिवमा दोहोरिन चाहेका छन् भने वर्तमान उपमहासचिव प्रदीप ज्ञवाली र पृथ्वीसुब्बा गुरुङले समेत महासचिवमा दाबी गरेका छन्।

तीनजना मध्येबाट एक जनालाई महासचिवको उम्मेदवार बनाउने ओलीको तयारी छ। यसैगरी उमहासचिवमा विष्णु रिमाल, लेखराज भट्ट, छविलाल विश्वकर्मा, पद्मा अर्यालले रुची देखाएका छन्।

यसैगरी सचिवमा भीम आचार्य, भानुभक्त ढकाल, महेश बस्नेत, विशाल भट्टराई, राजन भट्टराई, राजेन्द्र गौतमलगायतले रुची देखाएका छन्।
उनीहरुलाई आफ्नो पक्षमा कायम गरिराख्नु ओलीको चुनौतीका रुपमा हेरिएको छ। यद्यपि उनीहरुले चासो राखे पनि खुलेर ओली समक्ष मुख नखोलेको बताइएको छ।

ओलीले ती नामलाई अन्तिम रुप दिएर केही दिनभित्रै सार्वजनिक गर्ने तयारीसमेत गरेका छन्। दशौं महाधिवेशनको जस्तो सहज अवस्था नदेखेपछि ओली आफू र आफ्नो टीम जिताउने रणनीतिमा व्यस्त छन्। ओलीको कार्यशैलीबाट रुष्ट बनेका नेता कार्यकर्तालाई रिझाउन ओलीलाई सकस गरिरहेको छ।

पदाधिकारी हुन चाहने नेताहरूले आन्तरिक लबिइङ सुरु गरिसकेका छन्। अहिलेको स्थायी कमिटी र पोलिटब्युरोमा रहेका अधिकांश नेताहरू पदाधिकारी हुन खोजेका छन्।

उता ओलीसँग प्रतिस्पर्धा गर्न तयार भएका वरिष्ठ उपाध्यक्ष ईश्वर पोखरेल पनि आफ्नो टीम बनाउन व्यस्त छन्। कसेसम्म ओली पक्षमा प्रभावशाली नेतालाई आफ्नो समूहमा ल्याउने कसरत गरिरहेका पोखरेलले उपाध्यक्षमा अष्टलक्ष्मी शाक्य र सुरेन्द्र पाण्डेलाई प्रस्ताव गरेका छन्। यसैगरी महासचिवमा योगेश भट्टराई, उपमहासचिवमा गोकर्ण विष्ट, सचिवमा ठाकुर गैरै, विन्दा पाण्डेलगायतलार्य प्रस्ताव गरेको बताइएको छ।

१९ सदस्यीय पदाधिकारी घटाएर १५ सदस्यीय बनाउने गत भदौ तेस्रो साता सम्पन्न दोस्रो विधान महाधिवेशनबाट विधान संशोधन गरिएको छ। पदाधिकारी भइसकेका र हुन खोज्नेलाई व्यवस्थापन गर्न सकस भएपछि पदाधिकारी संख्या बढाउन आवाज उठिरहेको छ।

गत भदौ तेस्रो साता भएको एमालेको दोस्रो विधान महाधिवेशनले १९ सदस्यीय पदाधिकारी घटाएर १५ सदस्यीय बनाएको छ । राष्ट्रिय महाधिवेशनले अध्यक्ष, ३ उपाध्यक्ष, महासचिव, ३ उपमहासचिव, ७ सचिवसमेत २ सय ५१ सदस्यीय केन्द्रीय कमिटीको व्यवस्था गरेको छ। यस्तै, प्रदेश कमिटीका अध्यक्षहरू केन्द्रीय कमिटीको पदेन सदस्य हुने व्यवस्था छ। आगामी महाधिवेशनमा यही पदमा प्रतिस्पर्धा हुँदै छ।

यसैगरी, एमालेले केन्द्रीय सचिवालयको व्यवस्था हटाएर १५ सदस्यीय पदाधिकारीलाई नै स्थायी कमिटीमा परिणत गरेको छ। पोलिटब्युरो र केन्द्रीय कमिटीको संरचना रहनेछ। २ सय ५१ को एक तिहाइ ८४ सदस्यीय पोलिटब्युरो हुनेछ। स्थायी कमिटी नरहने भएकाले धेरै नेता पोलिटब्युरोमै रहनेछन्। केन्द्रीय सचिवालयको व्यवस्था हटेको छ।