काठमाडौं । सोमबार राति उत्तरपूर्वी जापानमा गएको ७.६ म्याग्निच्युडको शक्तिशाली भूकम्पमा परी कम्तीमा ३० जना घाइते भएका छन्। भूकम्पका कारण हजारौं मानिसहरू आफ्नो घर छोडेर भाग्न बाध्य भएका छन्।

जापानको मौसम विज्ञान एजेन्सीले स्थानीय समय अनुसार राति २३:१५ बजे भूकम्प गएको बताएको छ। यसको केन्द्रबिन्दु आओमोरी क्षेत्रको तटबाट लगभग ८० किलोमिटर टाढा, ५० किलोमिटर (३१ माइल) गहिराइमा रहेको थियो।

भूकम्पपछि देशभरि सुनामीको चेतावनी जारी गरिएको थियो, तर अब त्यो हटाइएको छ। यद्यपि, तटमा ७० सेन्टिमिटर (२७ इन्च) सम्मका छालहरू अवलोकन गरिएको थियो। केही रेल सेवाहरू रोकिएका थिए र हजारौं घरहरूमा बिजुली आपूर्ति बन्द भएको थियो।

स्थानीय सञ्चारमाध्यमका अनुसार, अधिकारीहरूले आगामी दिनहरूमा अझ शक्तिशाली भूकम्प जान सक्ने चेतावनी दिएका छन् र मानिसहरूलाई कम्तिमा एक हप्तासम्म उच्च सतर्कतामा रहन भनिएको छ।

“आफ्नो भूकम्पको तयारीको पुन: जाँच गर्नुहोस् र यदि तपाईंलाई भूकम्पको झट्का महसुस भयो भने तुरुन्तै सुरक्षित स्थानमा जान तयार रहनुहोस्,” जापानी प्रधानमन्त्री साने ताकाइचीले भने।

समाचार एजेन्सी रोयटर्सका अनुसार करिब ९० हजार मानिसहरूलाई घर छोड्न आदेश दिइएको छ।