काठमाडौं । सोमबार बिहानै अमेरिकी उपराष्ट्रपति जेडी भान्सको ओहायोस्थित घरमा आक्रमण भएको छ । अमेरिकाको सिक्रेट सर्भिसले उपराष्ट्रपति जे.डी. भान्सको ओहायोस्थित घरमा झ्याल फुटाएर प्रवेश गर्ने र अन्य सम्पत्ति क्षति गर्ने एक व्यक्तिलाई पक्राउ गरेको जनाएको छ।

सिक्रेट सर्भिसका प्रवक्ता एन्टोनी गुग्लिएल्मीले एपीलाई पठाएको विज्ञप्तिमा बताएअनुसार मध्यरातपछि भान्सको सिन्सिनाटीस्थित घरमा खटिएका एजेन्टहरूले उक्त व्यक्तिलाई नियन्त्रणमा लिएका थिए। उपराष्ट्रपति भान्स र उनका परिवार त्यतिबेला घरमा थिएनन्; उनीहरू आइतबार वाशिङ्टन फर्किएका थिए।

मध्यराततिर घरमा ठूलो आवाज सुनेपछि एजेन्टहरूले एक व्यक्तिलाई हथौडा प्रयोग गरी झ्याल फुटाएर भित्र पस्ने प्रयास गरिरहेको अवस्थामा फेला पारे। उक्त व्यक्तिले घरको ड्राइभवे हुँदै जाँदा सिक्रेट सर्भिसको सवारीसाधनमा पनि तोडफोड गरेको अधिकारीहरूले जनाए।

कानून कार्यान्वयन निकायका अनुसार पक्राउ परेका व्यक्ति २६ वर्षीय विलियम डिफोर हुन्, जो सिन्सिनाटीमा बसोबास गर्ने सार्वजनिक अभिलेखमा उल्लेख छ। उनका सम्भावित आफन्त वा अघिल्ला वकिललाई सम्पर्क गर्दा तत्काल प्रतिक्रिया प्राप्त भएन।

डिफोरलाई मंगलबार तोडफोड, अवैध प्रवेश, सम्पत्ति क्षति र सरकारी काममा अवरोध पुर्‍याएको अभियोगमा अदालतमा पेश गरिनेछ। भान्सले सामाजिक सञ्जाल एक्समा प्रतिक्रिया दिँदै सिक्रेट सर्भिस र सिन्सिनाटी प्रहरीले छिटो कारबाही गरेकोमा आभार व्यक्त गरेका छन्।

उनले लेखे, “हाम्रो घरमा भएको आक्रमणबारे सबैको शुभेच्छाका लागि धन्यवाद। जति बुझ्न सकेँ, एक मानसिक रोगी व्यक्तिले हथौडा प्रयोग गरेर झ्याल फुटाउँदै भित्र पस्ने प्रयास गरेको रहेछ।”

अदालत अभिलेखअनुसार डिफोरलाई २०२४ मा पनि तोडफोडको अभियोग लागेको थियो र उनलाई काउन्टीको मानसिक स्वास्थ्य अदालत प्रणालीअन्तर्गत उपचारमा सहभागी गराइएको थियो।

सिक्रेट सर्भिस अहिले सिन्सिनाटी प्रहरी विभाग र अमेरिकी अटर्नीको कार्यालयसँग मिलेर थप अभियोगबारे निर्णय गर्न समन्वय गरिरहेको छ।

भान्सको घर शहरका पुराना बस्तीमध्ये एकमा, सहरलाई माथिबाट हेर्न सकिने डाँडामा अवस्थित छ। भान्स उपराष्ट्रपति पदमा रहँदै गर्दा त्यहाँ प्रायः प्रदर्शनहरू हुने गरेका छन् । गत वसन्तमा त भान्स आफैंसँग प्रदर्शनकारीहरूको झडपसमेत भएको थियो।

भान्स उपराष्ट्रपति बन्नुअघि ओहायोबाट अमेरिकी सिनेटर थिए। उनले कानुन अध्ययनपछि सिलिकन भ्यालीमा केही समय बिताएर सिन्सिनाटीमा बसाइ सरेका थिए।

उनका भाइले गत वर्ष मेयर पदका लागि उम्मेदवारी दिएका थिए तर विजयी हुन सकेनन्। भान्सको बाल्यकाल नजिकैको मिडलटाउनमा बितेको थियो, जुन उनको चर्चित आत्मकथा “हिलबिली एलेगी” मा प्रमुख रूपमा वर्णन गरिएको छ