काठमाडौं । ह्वाइट हाउसले इरानले लगभग ८०० जनाको मृत्युदण्ड रोकेको दाबी गरेको छ। यो जानकारी ह्वाइट हाउसकी प्रेस सचिव क्यारोलिन लेभिटले दिएकी हुन्।

“राष्ट्रपति (ट्रम्प) र उनको टोलीले इरानी शासनलाई सन्देश पठाएका छन् कि यदि हत्या जारी रह्यो भने गम्भीर परिणामहरू भोग्नुपर्नेछ…” लेभिटले भनिन् ।

उनले भनिन्, “राष्ट्रपतिले बिहीबार जानकारी प्राप्त गरेअनुसार शुक्रबारका लागि तय गरिएको ८०० मृत्युदण्ड स्थगित गरिएको छ। राष्ट्रपति र उनको टोलीले परिस्थितिलाई नजिकबाट निगरानी गरिरहेका छन् र राष्ट्रपतिका लागि सबै विकल्पहरू खुला छन्।”

इरानमा केही दिनदेखि विरोध प्रदर्शनहरू जारी छन् धेरै रिपोर्टहरूले इरानी अधिकारीहरूले प्रदर्शनकारीहरूलाई मृत्युदण्ड दिइरहेका दाबी गरेका छन्।

अमेरिकी राष्ट्रपति डोनाल्ड ट्रम्पले यदि इरानले कुनै पनि प्रदर्शनकारीलाई मृत्युदण्ड दियो भने अमेरिकाले त्यसविरुद्ध ‘धेरै कडा कारबाही’ गर्ने चेतावनी दिएका थिए।

इरफान सोल्तानीलाई हालै तेहरानमा भएको विरोध प्रदर्शनको क्रममा हिरासतमा लिइएको थियो। एक आफन्तले बीबीसी फारसीलाई बताएअनुसार दुई दिन भित्रै अदालतले उनलाई मृत्युदण्डको सजाय सुनाएको छ।

तर, बिहीबार इरफान सुल्तानीको मृत्युदण्ड रोकिएको खबर आयो।

इरानको राज्य प्रसारण एजेन्सीले न्यायपालिकालाई उद्धृत गर्दै भनेको छ, “इरफान सोल्तानीलाई जनवरी १० मा अशान्तिको समयमा पक्राउ गरिएको थियो। उनीमाथि देशको आन्तरिक सुरक्षा विरुद्ध भेला भएको र षड्यन्त्र गरेको र शासन विरुद्ध प्रचार गतिविधि गरेको आरोप छ।”

बीबीसी फारसीका अनुसार न्यायपालिकाले भनेको छ, “यदि अभियोजन पक्षले आफ्नो आरोप प्रमाणित गर्छ र सक्षम अदालतले कानुनी फैसला दिन्छ भने, कानूनद्वारा तोकिएको सजाय कारावास हो। यी आरोपहरूको लागि मृत्युदण्डको कुनै प्रावधान छैन।”

रिपोर्टमा भनिएको छ – इरफान सुल्तानी हाल कारज केन्द्रीय कारागारमा छन्।