गुल्मी । गुल्मीमा मलामी बोकेको जिप दुर्घटना हुँदा एक जनाको मृत्यु भएको छ भने आठ जना घाइते भएका छन्।

गुल्मीको रुरु क्षेत्र गाउँपालिका–९ रिडी खर्ज्याङ्ग सडक खण्डको खोल्टेपानीमा लु१च ६९८५ नम्बरको डबल क्याप बोलेरो जिप दुर्घटनामा परेको प्रहरीले जनाएको छ।

मृत्यु हुनेमा पाल्पाको रिब्दीकोट गाउँपालिका–१ निवासी २६ वर्षीय टिकाराम कुमाल रहेका छन्। रिडी प्राथमिक स्वास्थ्य केन्द्रमा उनको उपचारका क्रममा ज्यान गएको हो।

घाइते हुनेहरूमा पाल्पा, जोगीथुमका ३० वर्षीय सुरज कुमाल, ३२ वर्षीय अर्जुन कुमाल, ४२ वर्षीय माधव कुमाल, ५५ वर्षीय याम बहादुर कुमाल, ५५ वर्षीय कृष्ण बहादुर कुमाल, ६१ वर्षीय धोज बहादुर कुमाल, ३३ वर्षीय सोम बहादुर कुमाल र ४५ वर्षीय खडक बहादुर कुमाल रहेका छन्। उनीहरूको रुरु प्राथमिक स्वास्थ्य केन्द्र रिडीमा उपचार भइरहेको छ।