कृष्ण उपासना आध्यात्मिक चेतनाको अत्यन्त सशक्त धारा हो, जसले भक्ति, प्रेम र दिव्य-मानव सम्बन्धलाई केन्द्रमा राख्छ। श्रीकृष्णलाई परम सत्यको साकार अभिव्यक्ति, लीला-पुरुषोत्तम र जीवनदर्शनका मार्गदर्शकका रूपमा हेर्ने परम्परा वैदिक कालदेखि नै विकसित हुँदै आएको छ।

गीता दर्शनले कर्म, ज्ञान र भक्तिको समन्वय प्रस्तुत गर्दै मानव जीवनलाई धर्म, कर्तव्य र आत्मबोधतर्फ उन्मुख गराउँछ। कृष्ण उपासनामा प्रेम (प्रेमभाव), समर्पण (श्रद्धा) र एकत्व (अद्वैत अनुभूति) मूल तत्त्व हुन्, जहाँ भक्त र भगवानबीचको सम्बन्ध चेतनाको गहिरो मिलनमा रूपान्तरित हुन्छ।

यही आध्यात्मिक आधारभूमिमा प्रणामी परम्पराको विकास भएको देखिन्छ। प्रणामी आध्यात्मिकता कृष्णभक्तिको भावभूमिमा उभिए पनि यसको दृष्टि व्यापक र समन्वयकारी छ। यस परम्पराले धर्मलाई विभाजनको साधन नभई एकताको सूत्रका रूपमा प्रस्तुत गर्छ। भक्ति यहाँ ज्ञान र विवेकसँग जोडिएको चेतनात्मक अभ्यास हो। आत्मा-मुक्ति, सत्यको खोज र परमेश्वरसँगको एकत्व प्रणामी चिन्तनका केन्द्रीय लक्ष्य हुन्।

प्रणामी दर्शनले विभिन्न धार्मिक परम्पराहरूको मूल सन्देश एउटै रहेको तर्क प्रस्तुत गर्छ-सत्य, प्रेम र मानवता। यसले बाह्य अनुष्ठानभन्दा बढी आन्तरिक शुद्धता, सेवा र सहिष्णुतालाई महत्व दिन्छ।

कृष्ण उपासनाको प्रेममय भक्ति र प्रणामी परम्पराको समन्वयकारी दृष्टिकोण मिलेर एक यस्तो आध्यात्मिक धरातल निर्माण गर्छ, जहाँ व्यक्ति आत्मिक उन्नति मात्र होइन, सामाजिक सद्भाव र सहअस्तित्वतर्फ पनि उन्मुख हुन्छ।

कृष्ण उपासना र प्रणामी आध्यात्मिक परम्परा मानव चेतनालाई उच्च नैतिकता, सार्वभौमिक एकता र दार्शनिक गहिराइतर्फ लैजाने मार्गहरू हुन्। आधुनिक विश्वमा बढ्दो विभाजन र असहिष्णुताबीच, यी परम्पराहरूले प्रेम, समर्पण र समन्वयमार्फत मानवतालाई पुनः जोड्ने सम्भावना प्रस्तुत गर्छन्।

धर्म, दर्शन र सांस्कृतिक एकता सम्बन्धी सत्यमुखी अध्ययनमा “लर्ड कृष्ण एण्ड प्रणामी फेथ” नामक ग्रन्थले एक विशिष्ट स्थान ओगटेको छ। विश्वमा धार्मिक बहुलता, सांस्कृतिक विविधता र सामाजिक भेदभावका बीचमा सामूहिक एकता र साझा मानवता खोज्ने प्रयास सदैव चुनौतीपूर्ण रहँदै आएको छ।

यसै चुनौतीलाई सामना गर्दै अहुजाले यस पुस्तकमार्फत श्रीकृष्णप्रणामी धर्मको दर्शन, इतिहास, सांस्कृतिक पृष्ठभूमि र आध्यात्मिक सन्देशलाई समग्र रूपमा व्याख्या गरेका छन्।

पुस्तकले हिन्दू धर्म, विशेषतः कृष्ण उपासना को परम्परा र प्रवाहलाई पनि विवेचना गरेको छ; साथै महामती प्राणनाथ र स्वामी देवचन्द्रजी जस्ता प्रणामी धर्मका संस्थापकहरूको योगदानलाई अनुशीलनात्मक दृष्टिकोणबाट उजागर गरेको छ। यस समीक्षामा पुस्तकका प्रमुख विषयवस्तु, संरचना, लेखकको दृष्टिकोण, भाषा एवं शैली, दर्शनिक पक्ष र सामाजिक-धार्मिक महत्वलाई गहिरोसँग विश्लेषण गरिएको छ।

पुस्तकले हिन्दू धर्मको मूल स्वरूप र विशेष गरी कृष्ण उपासना सम्बन्धी ऐतिहासिक, सांस्कृतिक र दार्शनिक आधार उजागर गर्ने प्रयास गरेको छ। यसले धार्मिक आस्थामा सीमित नभई, कृष्णको जीवन, लीलाहरू, भक्ति परम्परा र साहित्यिक, कलात्मक तथा मूर्तिकला माध्यममा यसको अभिव्यक्तिलाई समेटेको छ।

पुस्तकले महामती प्राणनाथ र स्वामी देवचन्द्रको जीवन र दर्शनमार्फत अहिंसा, सेवा, सहिष्णुता र सार्वभौमिक प्रेमको आधार खुलासा गरेको छ साथै, तारतम मन्त्र र कुलझम स्वरूपमार्फत प्रणामी धर्मको मूल उद्देश्य, अर्थात् आत्माको मोक्ष र परमेश्वरसँगको एकात्मता, स्पष्ट रूपमा व्याख्या गरिएको छ।

पुस्तकले प्रणामी धर्मका प्रमुख सिद्धान्तहरू, सामाजिक प्रभाव र मानव चेतनामा यसको योगदानलाई पनि उजागर गरेको छ। धर्मलाई अनुयायीहरूको संकीर्ण आस्था मात्र नभई, विश्वशान्ति, सहअस्तित्व र एकात्मक धर्म दर्शनको रूप दिन सकिने माध्यमको रूपमा प्रस्तुत गरिएको छ।

यसले पाठकलाई मानवता, सहिष्णुता र सार्वभौमिक मूल्यहरूको पुनःप्रवर्धन गर्ने प्रेरणा पनि दिन्छ। पुस्तक धार्मिक, दार्शनिक र सामाजिक दृष्टिले बहुआयामिक अध्ययनको स्रोत बन्न सफल भएको छ। पुस्तक संरचनात्मक रूपमा क्रमबद्ध छ र प्रत्येक अध्यायले स्वतन्त्र विषयलाई धेरै स्पष्ट र सुबोध तरिकाले प्रस्तुत गरेको छ।

पुस्तकको पहिलो अध्यायले हिन्दू धर्मको मूल अवधारणा स्पष्ट रूपमा प्रस्तुत गरेको छ। यसमा धर्मको दार्शनिक, सांस्कृतिक र आध्यात्मिक पक्ष समेटिएको छ। भगवान कृष्णको चरित्र, उनका लीलाहरू र मानव जीवनमा त्यसको महत्वलाई विशेष रूपले व्याख्या गरिएको छ। यसमा कृष्ण उपासनालाई साहित्यिक, भावनात्मक र भक्तिपूर्ण दृष्टिकोणबाट बुझ्न मद्दत गर्छ।

कृष्णको बाल्यकालीन खेलहरू, गोपिसँगको सम्बन्ध र युद्धभूमि कुरुक्षेत्रमा अर्जुनलाई दिएको उपदेशले पाठकलाई भक्ति, धर्म र जीवन मूल्यहरूको वास्तविक अर्थ बुझाउँछ। यस अध्यायले धार्मिक अध्ययनसँगै दर्शनशास्त्र र सांस्कृतिक अध्ययनलाई पनि जोडेको छ।

दोस्रो अध्यायले प्रणामी धर्मको उदय, विस्तार र ऐतिहासिक पृष्ठभूमि प्रस्तुत गर्दछ। यसमा प्रणामी परम्पराको आरम्भ, विकास र हिन्दू-मुस्लिम सांस्कृतिक समानतामा आधारित धर्म दर्शनको चर्चा गरिएको छ।

प्रणामी धर्मले समाजमा सहिष्णुता, मेलमिलाप र समन्वयको वातावरण सिर्जना गर्ने प्रयास गरेको छ भन्ने कुरालाई स्पष्ट पारिएको छ। यस धर्मको सामाजिक भूमिका, समुदायमा यसको योगदान र मानवीय मूल्यहरूमा पारेको प्रभावलाई विशेष स्थान दिइएको छ। यसले पाठकलाई धार्मिक अभ्यास मात्र होइन, सामाजिक दृष्टिले प्रणामी धर्मको महत्त्व बुझ्न मद्दत गर्छ।

तेस्रो अध्यायमा प्रणामी धर्मका संस्थापकहरूको जीवन, दर्शन र योगदानलाई विस्तारमा प्रस्तुत गरिएको छ। स्वामी देवचन्द्र र महामती प्राणनाथले धर्म, दर्शन र मानव जीवनको उच्च मूल्यहरूलाई एकात्मिक रूपमा समेटेका छन्। पुस्तकले प्राचीन ग्रन्थहरूको तुलनात्मक अध्ययन गरी धार्मिक समन्वय र सहिष्णुताको महत्त्व बुझाउँछ।

“एक विश्व, एक धर्म” को अवधारणाले धर्मलाई आस्थामा मात्र सीमित नराखी, विश्व शान्ति र सार्वभौमिक एकताका दृष्टिले प्रस्तुत गरेको छ। यस अध्यायले पाठकमा आध्यात्मिक चेतना र सामाजिक जिम्मेवारीको भावना विकास गर्छ।

चौथो अध्यायले प्रणामी धर्मका पवित्र ग्रन्थहरूको महत्त्व र आत्माको मुक्तिका सिद्धान्त प्रस्तुत गर्दछ। तारतम मन्त्र, जसले मानव जीवनलाई धर्म, मोक्ष र ईश्वरसँगको एकात्मताको मार्गमा निर्देशित गर्छ, यस अध्यायको केन्द्रबिन्दु हो।

पुस्तकले उद्धारको मार्ग र आत्मा-उद्धारका सिद्धान्तलाई सरल, व्यवस्थित तरिकाले व्याख्या गरेको छ। यसले पाठकलाई धार्मिक ज्ञान मात्र प्रदान नगरी जीवनका मूल्य, कर्म, भक्ति र आत्मा-चेतनाको गहिरो समझ दिन्छ।

पाँचौं अध्यायले प्रणामी धर्मको दैनिक जीवनमा आधारित अभ्यासहरू प्रस्तुत गर्दछ। पूजा, भजन, ध्यान र सेवा जस्ता आध्यात्मिक अभ्यासले व्यक्तिको आन्तरिक चेतना विकास गर्छ। त्यस्तै, सामाजिक अभ्यासमा सामुदायिक मेलमिलाप, सेवा र सामाजिक एकताको महत्व उजागर गरिएको छ।

यसले धार्मिक अभ्यास र सामाजिक उत्तरदायित्वलाई सँगसँगै जोड्ने प्रयास गरेको छ। पाठकले धार्मिक जीवन र सामाजिक जीवन बीचको सन्तुलन बुझ्न र व्यवहारमा उतार्न सहज महसुस गर्छ।

पुस्तकको अन्तिम अध्यायले प्रणामी धर्मसँग सम्बन्धित प्रमुख तीर्थस्थल, मन्दिर र धार्मिक स्थलहरूको विवरण प्रस्तुत गरेको छ। भारत तथा विश्वका प्रमुख प्रणामी स्थलहरूको चर्चा, धार्मिक पर्यटन र सांस्कृतिक आदान–प्रदानमा यसको योगदानको व्याख्या गरिएको छ।

यसले पाठकलाई धार्मिक अध्ययन मात्र नभई सांस्कृतिक र ऐतिहासिक सन्दर्भमा पनि सशक्त ज्ञान प्रदान गर्दछ। अध्यायले प्रणामी धर्मलाई समग्र दृष्टिले बुझ्न र यसका आध्यात्मिक, सामाजिक र सांस्कृतिक पक्षको महत्व अनुभूत गर्न सहज बनाउँछ।

पुस्तकले हिन्दू धर्मको मूल अंगको रूपमा कृष्ण उपासना लाई ठाँउ दिँदै यसको ऐतिहासिक पृष्ठभूमि र सामाजिक प्रभावलाई विवेचना गरेको छ। भगवद्गीतामा वर्णित कृष्णको दर्शन, लीला थ्योरी, राधा-कृष्ण प्रेम, तथा भक्ति-संगीतका अद्वितीय रूपहरूलाई विस्तारमा व्याख्या गरिएको छ।

लेखकले कृष्णको चरित्रलाई दैवी अवतार मात्र नभई मानव-मानवता र सामाजिक सहअस्तित्वको प्रतीकका रूपमा पनि व्याख्या गरेका छन्। यसले हिन्दू धर्मलाई व्यापक धार्मिक दर्शनका रूपमा स्थापित गरेको छ, जसले सबै मानिसलाई समान रूपले समेट्न सक्छ।

पुस्तकले मीरा,सूरदास,निम्बार्क,वल्लभाचार्य,चैतन्य महाप्रभु जस्ता योगी-भक्तहरूको भक्ति मार्गलाई पनि सम्बन्धित पृष्ठभूमिमा राखेको छ, जसले कृष्ण भक्ति सँगै समग्र धार्मिक अनुभूति लाई उजागर गरेको छ।

श्रीकृष्णप्रणामी धर्मले हिन्दू-मुस्लिम, पाश्चात्य-पूर्वीय, दार्शनिक समानताको विचारलाई समृद्ध बनाएको छ।पुस्तकले धर्म धर्मिक विभाजनलाई टुटाएर सार्वभौमिक एकता, मानवता र प्रेमको सिद्धान्त प्रवर्धन गर्छ।

यसले शारीरिक, भाषिक, धार्मिक भेदसँगै मनोगत बन्धनको दर्शनलाई जड़ बनाउँछ।लेखकले प्रणामी परंपरालाई “एक विश्व, एक धर्म”, र “ईश्वरप्राप्तिको मार्ग समानता” को रूपमा व्याख्या गरेका छन्।  यसले पाठकलाई धार्मिक सहिष्णुता र वैश्विक बन्धुत्व को दिशा देखाउँछ।

पुस्तकको केन्द्रबिन्दुमा स्वामी देवचन्द्र र महामती प्राणनाथका अध्यात्मिक तथा सामाजिक योगदानलाई प्रमुख स्थान दिइएको छ। लेखकले उनीहरूको जीवन, आध्यात्मिक साधना, प्रेरणादायक अनुभव र दार्शनिक चिन्तनलाई सरल, स्पष्ट र सुबोध भाषामा प्रस्तुत गरेका छन्।

स्वामी देवचन्द्रको जीवन र शिक्षाले भक्तिको मार्गलाई प्रस्ट बनाउँछ भने महामती प्राणनाथको दर्शनले धार्मिक सहिष्णुता, सार्वभौमिक प्रेम र मानवताको एकात्मताको महत्त्वलाई उजागर गरेको छ।

विशेषतः महामती प्राणनाथको कार्यमा कुरान र भगवद्गीताको तुलनात्मक अध्ययनलाई आधार मानिएको छ। यसले विभिन्न धर्मका ग्रन्थहरूले मानवको उद्धार र ईश्वरप्राप्तिलाई मूल लक्ष्य मानेका छन् भन्ने देखाउँछ।

उनले धर्मको सार्वत्रिक सन्देशलाई जनसमुदायसम्म पुर्याएर समाजमा शान्ति, सहअस्तित्व र मानवताको भावना प्रवर्द्धन गर्न योगदान दिएका छन्। यस अंशले श्रीकृष्णप्रणामी धर्मलाई हिन्दू धर्मको उपधारो मात्र नभई सार्वभौमिक, मानव–केन्द्रित र सामूहिक दर्शनका रूपमा स्थापित गरेको छ।

पाठकले यस पुस्तकमार्फत धर्मलाई जीवनसँग सम्बन्धित नैतिक, सामाजिक र आध्यात्मिक मूल्यहरूको माध्यमका रूपमा बुझ्न सक्छ। स्वामी देवचन्द्र र महामती प्राणनाथको योगदानले धर्मलाई जीवन-दर्शन, सेवा र समाजिक उत्तरदायित्वसँग जोड्ने स्पष्ट मार्गदर्शन प्रस्तुत गरेको छ। पुस्तकले आध्यात्मिक गहिराईसँगै सामाजिक चेतनालाई पनि जागृत बनाउने काम गरेको छ।

“तारतम मन्त्र” र कुलजम स्वरूप प्रणामी धर्मका पवित्र सिद्धान्त हुन्। पुस्तकले यी ग्रन्थहरूको आध्यात्मिक, दार्शनिक र सामाजिक महत्त्व स्पष्ट पार्दछ। लेखकले वर्णन गरेका छन् कि आत्माको मुक्तिका मार्ग, जीवनको सत्य लक्ष्य र ईश्वरप्राप्ति तारतम मन्त्रोद्धेश्य दर्शनमार्फत स्पष्ट हुन्छ।

यस दर्शनका मुख्य तत्व-भक्ति (ईश्वरप्रेम), ज्ञान (धार्मिक बोध) र सेवा (समाजसेवा)-लाई जीवनको मार्गदर्शक सिद्धान्त मानिन्छ। आध्यात्मिक अनुभूति मात्र नभई यसले जीवन व्यवहार, सामाजिक समन्वय र मानवीय दायित्वलाई पनि मार्गदर्शन गर्दछ। यसरी, प्रणामी धर्मले व्यक्तित्व र समाज दुवैमा सकारात्मक प्रभाव पार्ने उद्देश्य राखेको छ।

पुस्तकको भाषा सरल, सुबोध र बोधगम्य छ, जसले सामान्य पाठकदेखि विद्वानसम्म सबैलाई सान्दर्भिक जानकारी सहजै बुझ्न सक्ने बनाएको छ। लेखकले धर्म, दर्शन र सांस्कृतिक विषयवस्तुहरूलाई जटिल धार्मिक शब्दावली वा प्राचीन ग्रन्थका कठिन व्याख्यामा नबगाइ, प्रत्यक्ष र प्रभावकारी ढंगले प्रस्तुत गरेका छन्। यसले पाठकलाई विषयसँग सम्बन्धित अवधारणाहरूको वास्तविक अर्थ र प्रयोगबारे स्पष्ट दृष्टिकोण दिन्छ।

लेखकको शैली शोधपरक, तथ्य आधारित र दार्शनिक दृष्टिकोणयुक्त छ। उनले कुनै पनि दाबी वा व्याख्यामा आधिकारिक सन्दर्भ, पुराणिक उद्धरण र तर्कको प्रयोग गरेर विश्वासयोग्य र प्रमाणिक आधार प्रस्तुत गरेका छन्। पुस्तक जानकारीमूलक मात्र नभई विश्लेषणात्मक र बौद्धिक स्तरमा पाठकलाई सक्रिय बनाउने माध्यम पनि बनेको छ।

लेखकले धर्म, दर्शन, इतिहास र सामाजिक मूल्यका बीचको सम्बन्धलाई सहज र प्राकृतिक रूपमा बुझाउने कला प्रस्तुत गरेका छन्। यसले पाठकलाई जीवन व्यवहार, सामाजिक समन्वय र आध्यात्मिक मूल्यहरूमा पनि प्रतिबिम्बित हुन उत्प्रेरित गर्छ। सरल भाषा, तथ्य-प्रधान शैली र स्पष्ट व्याख्याले पुस्तकलाई पठनीय, प्रभावकारी र बौद्धिक रूपमा समृद्ध बनाएको छ।

यस पुस्तकका प्रमुख विशेषताहरूलाई विश्लेषण गर्दा यसले धार्मिक अध्ययन, दर्शन र सामाजिक सन्दर्भमा प्रभाव पार्ने देखिन्छ। पहिलो, पुस्तकले व्यापक ऐतिहासिक पृष्ठभूमि प्रस्तुत गरेको छ। हिन्दू धर्म, कृष्ण उपासना र प्रणामी धर्मको उदय, विस्तार तथा सामाजिक-सांस्कृतिक संरचनालाई सुसंगत र स्पष्ट रूपले वर्णन गरिएको छ।

पाठकले धर्मको दर्शन मात्र नभई यसको ऐतिहासिक, साहित्यिक र सांस्कृतिक पाटो पनि बुझ्न सक्छन्।दोस्रो, दर्शनिक स्पष्टता पुस्तकको अर्को विशेषता हो। महामती प्राणनाथ र स्वामी देवचन्द्रको दार्शनिक चिन्तनलाई आधुनिक परिप्रेक्षमा राख्दै लेखकले तिनीहरूको जीवन, विचार र योगदानलाई सहज भाषामा व्याख्या गरेका छन्।

यसले पाठकलाई प्राचीन दर्शनलाई वर्तमान जीवन र सामाजिक परिप्रेक्षमा बुझ्न मद्दत पुर्याउँछ।तेस्रो, पुस्तकले वैश्विक सन्देश प्रवर्द्धन गरेको छ। धार्मिक सहिष्णुता, मानव एकता र सार्वत्रिकताका सन्देशले यसलाई एक धार्मिक ग्रन्थ नभई मानवतामूलक दर्शनको रूपमा स्थापित गरेको छ।

चौथो, साहित्यिक प्रस्तुति र भाषा शैली पनि पठनीयता र प्रभावकारितामा उत्कृष्ट छन्। स्पष्ट, साधारण र वैज्ञानिक व्याख्याले जटिल विषयलाई बुझ्न सजिलो बनाएको छ।पुस्तक पाठक मैत्री छ। जटिल धार्मिक र दार्शनिक विषयहरूलाई सरल, स्पष्ट र प्रभावकारी ढंगले प्रस्तुत गर्दा सबै पाठकका लागि उपयोगी र प्रेरणादायक बनेको छ।

यस पुस्तकको समीक्षा गर्दा केही सीमितताहरू पनि देखिन्छन्। पहिलो, डेप्थ अध्ययनमा केही कमी देखिन्छ। कतिपय अध्यात्मिक वा तात्त्विक विश्लेषण अझ गहिरोसँग गर्नु पर्ने थियो, विशेष गरी कुलजम स्वरूप, तारतम मन्त्र र प्रणामी धर्मका मूल सिद्धान्तका व्याख्यामा।

यस्ता विषयहरूमा थप विवरण र गहिरो दार्शनिक विमर्श पाठकको समझ र अनुसन्धानका लागि आवश्यक थियो।दोस्रो, सन्दर्भको विस्तृतता पर्याप्त छैन। पुस्तकमा आधिकारिक उद्धरण र सन्दर्भ दिइएको भए पनि पाठकले आन्तरिक अध्ययन वा अनुसन्धान गर्न चाहँदा ग्रन्थ सूची, टिप्पणी र थप सन्दर्भहरू समावेश हुनु आवश्यक थियो।

यसले पाठकलाई धर्मशास्त्र, दर्शनशास्त्र र प्रणामी साहित्यको मूल स्रोतसँग सिधा सम्पर्क गर्न सहज बनाउने थियो।तेस्रो, आधुनिक धर्म साहित्यसँगको तुलना अनुपस्थित छ। प्रणामी धर्मलाई अन्य धार्मिक आन्दोलनसँग तुलना गरेर सामाजिक, दार्शनिक र वैश्विक दृष्टिले गहिरो विश्लेषण गरिएको भए पुस्तक अझ बहुआयामिक र तुलनात्मक अध्ययनको रुपमा प्रस्तुत हुने थियो।

यी सीमितताहरूको बावजुद, पुस्तक धार्मिक, दार्शनिक र सामाजिक दृष्टिले मूल्यवान छ। तर यी सुधारले यसलाई अझ अनुसन्धान र गहिरो अध्ययनका लागि उपयोगी बनाउने थियो।

सन् २०२० पछि विश्वभर धर्मको विभाजन, कट्टरता र हिंसात्मक दर्शनले समाजमा विछेद ल्याएको देखिन्छ। विभिन्न धार्मिक समूहबीच द्वन्द्व, आक्रोश र गलत व्याख्याले समुदायहरूलाई अलग-अलग बनाएको छ। यस्तो चुनौतीपूर्ण पृष्ठभूमिमा लर्ड कृष्ण एण्ड प्रणामी फेथजस्तो पुस्तक अत्यन्त महत्वपूर्ण भइसकेको छ। यसले धार्मिक सहिष्णुता, सामाजिक मेलमिलाप र मानवता-केन्द्रित दर्शनको सन्देश स्पष्ट पार्छ।

पुस्तकले धार्मिक विविधता भित्रको साझा मूल्य-एकता, प्रेम, सेवा र सत्यलाई उजागर गरेको छ। हिन्दू, मुस्लिम, ईसाई, बौद्ध तथा अन्य सम्प्रदायका पाठकहरूले यसबाट सिर्फ परम्परा र नियममा सीमित नभई मानव जीवनमा शान्ति र सद्भाव कायम राख्नु धर्मको वास्तविक उद्देश्य हो भन्ने बुझ्न सक्छन्।

लेखकले धर्मले समाज विभाजन होइन, मानवता एकताको मार्ग तय गर्नुपर्छ भन्ने भाव महामती प्राणनाथ र स्वामी देवचन्द्रका दर्शनमार्फत देखाएका छन् । यस पुस्तकले सम्पूर्ण मानवता र धर्मावलम्बीलाई प्रेम, सहिष्णुता र पारस्परिक समझदारीको सन्देश दिन्छ, जसले वर्तमान विश्वका द्वन्द्व र कट्टरताका चुनौतीहरूलाई सामना गर्न मार्गदर्शन प्रदान गर्दछ।

पुस्तकले हिन्दू धर्म, कृष्ण उपासना, प्रणामी परंपरा, मानव एकता र सार्वत्रिक दर्शनबारे विस्तृत जानकारी दिन्छ। यसले पाठकलाई धर्मको वास्तविक अर्थ, सहअस्तित्वको सार र मानवतामा धर्मको साँचो स्थान बुझ्न प्रेरित गर्छ।

स्वामी देवचन्द्र र महामती प्रन्नाथका दर्शनमार्फत लेखकले देखाएका छन् कि धर्मले विभाजन होइन, समाजमा मेलमिलाप, सहिष्णुता र सामूहिक चेतना प्रवर्द्धन गर्नुपर्छ। “लर्ड कृष्ण एण्ड प्रणामी फेथ” समय-समुदायको अत्यावश्यक पुस्तक हो।

यो साझा मन, मिलन र सार्वभौमिक मानव चेतनालाई उजागर गर्ने दृष्टिकोणका लागि पनि अनिवार्य सामग्री बनेको छ। यसले वर्तमान विश्वका धार्मिक चुनौतीहरू सामना गर्न र मानवतामुखी दृष्टिकोण विकास गर्न पाठकलाई प्रेरित गर्छ।