काठमाडौं । सेतो मच्छिन्द्रनाथको जात्रा आजदेखि सुरू भएको छ ।

यो जात्रा परम्परागत रूपमा अष्टमीदेखि सुरु भई नवमी र दशमीसम्म तीन दिन विशेष रूपमा मनाइन्छ । चैते दशैं अन्तर्गत रामनवमीको अघिल्लो दिनदेखि जात्रा प्रारम्भ हुने चलन रहेको छ ।

जात्राको क्रममा रथ असन, हनुमानढोका हुँदै लगनसम्म पुर्याइन्छ । लगन क्षेत्रमा सेतो मच्छिन्द्रनाथकी आमाको प्रतीक स्थानमा तीन चक्र परिक्रमा गरेपछि जात्रा सम्पन्न हुने परम्परा छ । त्यसको भोलिपल्ट स्थानीयले देवतालाई पुनः खटमा राखेर बहाल फर्काउने गर्छन् ।

शताब्दीयौँ पुरानो यो जात्रा धार्मिक आस्थासँगै मौलिक सीप, परम्परागत प्रविधि र सामुदायिक सहकार्यको उत्कृष्ट उदाहरणका रूपमा परिचित छ ।