काठमाडौं। पूर्वउपप्रधानमन्त्री एवं नेपाली कम्युनिष्ट पार्टी (नेकपा) का केन्द्रीय सदस्य वामदेव गौतमले नेकपा (एमाले) का अध्यक्ष केपी शर्मा ओलीलाई हिरासतमा राखिएको विषयमा सरकारको गम्भीर ध्यानाकर्षण गराएका छन् ।

प्रधानमन्त्री बालेन्द्र शाहलाई खुलापत्र लेख्दै नेता गौतमले ओलीलाई अपमानित हुने गरी हिरासतमा नराख्न सुझाव दिएका हुन् । सरकारले ओलीमाथि गरेको व्यवहार राजनीतिक र मानवीय दृष्टिकोणले गलत भएको नेता गौतमको टिप्पणी रहेको छ । ओलीमाथि लगाइएका आरोपहरु अदालतबाट प्रमाणित भएको खण्डमा मात्रै उनलाई थुनेर कारबाही गर्न नेता गौतमले सुझाव दिएका छन् ।

‘७४ वर्षको वृद्ध अवस्थामा पुगेका नेकपा (एमाले) का अध्यक्ष केपी शर्मा ओलीजीलाई किन अपमानित हुने गरी हिरासतमा राख्नुहुन्छ ? उहाँलाई थुन्नका निम्ति जे–जे तथ्य जम्मा गरिएको छ, ती सबै अदालतबाट प्रमाणित भएपछि थुनेर कारबाही गर्नु भए हुन्न र ? हाम्रो कानुनी व्यवस्था एवं विगतका अभ्यासअनुसार कुनै पनि घटनाका छानबिन प्रतिवेदन सरकारसमक्ष पेस भएपछि सम्बन्धित निकायले अध्ययन र अनुसन्धान गरेपछि, त्यस्तो अनुसन्धानको निष्कर्ष अनुसार मात्र कारबाही प्रक्रिया अगाडि बढ्ने हो,’ उनले भने ।

प्रधानमन्त्री शाह नेपालको ४३ औँ प्रधानमन्त्री बन्न र आजको अवस्थासम्म शान्तिपूर्ण रूपमा सम्पन्न भएका राज्यका क्रियाकलापहरूमा ओलीको योगदान रहेको पनि नेता गौतमले स्मरण गराएका छन् । ओलीका हकमा आकर्षित गरिएका वा गर्न खोजिएका कसुरलाई घटना, प्रमाण र कानुनले के भन्छ भन्ने कुराको परीक्षण पहिला हुनुपर्ने नेता गौतमको भनाइ छ ।

रातारात घर घेरेर, एकाविहानै ओलीलाई पक्राउ गर्ने शैली नै गलत रहेको उनको जिकीर छ । उनले प्रधानमन्त्री शाहलाई ओलीको गिरफ्तारीमा भएको गल्ती सच्याउन सुझाव दिएका छन् । वृद्ध, शारीरिक रूपमा पनि अस्वस्थ राजनीतिक व्यक्तिलाई यो तहको सकसमा पार्नु उचित नहुने नेता गौतमको भनाइ छ ।