काठमाडौँ । शिक्षा, विज्ञान तथा प्रविधिमन्त्री देवेन्द्र पौडेलले मुलुकको समृद्धिका लागि पूर्वमाओवादीबीच ध्रुवीकरण हुनुपर्ने बताएका छन् । प्रेस सेन्टर नेपाल प्रतिष्ठान प्रदेशको तेस्रो अधिवेशनको उद्घाटन गर्दै उनले आगामी निर्वाचनमा माओवादीलाई पहिलो शक्तिका रुपमा स्थापित गराउन माओवादी घटकबीच एकता अनिवार्य रहेको बताए ।

“निराशा र कुण्ठा हटाउँदै नयाँ ऊर्जाका साथ समाजवादी क्रान्तिलाई अगाडि बढाउन नयाँ पुस्ताले नेतृत्व गर्नुपर्छ”, उनले भने। प्रविधि सुहाउँदो पत्रकारिता गर्नुपर्नेमा जोड दिँदै उनले व्यक्तिगत स्वार्थभन्दा माथि उठेर जनताको पक्षमा कलम चलाउन आग्रह गरे ।प्रेस सेन्टर नेपालका निवर्तमान उपाध्यक्ष बलराम थापाले पत्रकारले जनताको विषयलाई उठाउनुपर्ने बताए। सेन्टरका निवर्तमान उपाध्यक्ष सचिन रोकाले पत्रकारितालाई बलियो बनाउन पत्रकारको क्षमता अभिवृद्धि गरिनुपर्ने बताए ।

यसैबीच, तेस्रो अधिवेशनबाट प्रतिष्ठान प्रदेशको अध्यक्षमा वीरेन्द्र वली सर्वसम्मति चयन भएका छन् । वरिष्ठ उपाध्यक्षमा रघुनाथ बजगाईं, खुल्ला उपाध्यक्षमा शम्भु दङ्गाल, समावेशी उपाध्यक्षमा छत्रबहादुर श्रेष्ठ, प्रमुख सचिवमा तुलसी सापकोटा, सचिव खुलामा अशोक घिमिरे, विमल खड्का, विजय फुयाँल, जनजाति सचिवमा विवेक लोप्चन, महिला सचिवमा पार्वती खड्का, मधेसी सचिवमा विजय यादव, दलित सचिवमा लक्ष्मण दर्नाल र कोषाध्यक्षमा रामचन्द्र बस्नेत चयन भएका छन् ।

यसैबीच, प्रेस सेन्टर नेपाल रासस शाखा अध्यक्षमा रत्नकृष्ण श्रेष्ठ अध्यक्षमा निर्वाचित भएका छन् । संगठनको तेस्रो अधिवेशनबाट उपाध्यक्षमा सुशील दर्नाल, सचिवमा नारायण ढुङ्गाना, सहसचिवमा समुन्द्रा घिमिरे र कोषाध्यक्षमा नवीन पौडेल निर्वाचित भएका छन् ।यसैगरी सदस्यमा विष्णुप्रसाद लामिछाने, जमुना धमला, शशीधर अधिकारी र प्रदीपराज वन्त निर्वाचित हुनुभएको छ । नवनिर्वाचित कार्यसमितिलाई बधाई दिँदै प्रेस सेन्टर नेपालका केन्द्रीय सदस्य हरि लामिछानेले सङ्गठनलाई एकताबद्ध बनाएर लैजान तथा श्रमजीवि जनताको पक्षमा कलम चलाउन आग्रह गरे।